Боловсрол, шинжлэх ухааны сайд Л.Энх-Амгалан өсвөр насны хүүхдүүдэд сэтгэл зүйн зөвлөгөө өгч, стресс бухимдлаа даван туулахад нь туслах үүднээс НҮБ-ын Хүүхдийн сантай хамтран тодорхой арга хэмжээ авах талаараа мэдээллээ.

Тэрбээр “НҮБ-ын Хүүхдийн сангийн Монгол Улс дахь суурин төлөөлөгч Алекс Хайкенстай уулзах үеэр санал нэгдсэн хамгийн чухал асуудал бол өсвөр насны сурагчдад сэтгэл зүйн зөвлөгөө өгч, тэднийг нийгмийн нэгэн эд эс болоход нь туслах асуудал байлаа. Ковидын үед “Пандемик стресс” гэсэн шинэ ойлголт гарч ирснийг ДЭМБ-аас зарласан. Тэгвэл удаан хугацаанд хөл хорионд байсан сурагчдад ч стресс, бухимдал тулгарна. Үүнийг даван туулахад нь туслах аргыг бид хамтран хайж, ажил хэрэг болгохоор тохирлоо” гэв.

Түүнчлэн теле болон онлайн сургалтын хүртээмжийг сайжруулж, өгөөжийг нь нэмэгдүүлэх, бага ангийн сурагчдын хичээлийн хоцрогдлыг арилгах, “Үдийн хоол” хөтөлбөрийг хэрэгжүүлэх, орон нутгийн сургуулиудыг боловсон ариун цэврийн байгууламжтай болгох гэх зэрэг олон чухал асуудлаар НҮБ-ийн Хүүхдийн сангийн Монгол Улс дахь суурин төлөөлөгч Алекс Хайкенстай санал солилцож, хамтран ажиллахаар болсон байна.