Боловсрол шинжлэх ухааны  яам, Е-Mongolia академитай хамтран нэгдүгээр ангийн элсэлтийг цахимаар зохион байгуулах талаар мэдээлэл хийлээ.

         Энэ үеэр Боловсролын ерөнхий газрын дарга Т.Ням-Очир “Энэ хичээлийн жилд ерөнхий боловсролын сургуульд улсын хэмжээнд 750 мянган хүүхэд элсэн орж, суралцах урьдчилсан тооцооллыг гаргасан.  Өнгөрсөн хичээлийн жилд 712 мянган хүүхэд сурсан. Ерөнхий боловсролын сургуульд сурч байгаа хүүхдийн тоо жил бүр 40 орчим мянгаар нэмэгддэг. Бид Улсын бүртгэлийн ерөнхий газар,  Үндэсний статистикийн хороо, Газрын харилцаа, геодези зураг зүйн газар, Хөдөлмөр нийгмийн хамгааллын яамны бүх мэдээллийн санг нэгтгэж, элсэлт, бүртгэлийн үйл ажиллагаанд мэргэжлийн байгууллагын оролцоог хангаж, хамтарч ажиллаж байгаа.

   Үндэсний статистикийн хорооны албан ёсны тоон мэдээллээр энэ жил зургаан настай 78345 хүүхэд байна.

    Улсын бүртгэлийн ерөнхий газар, Үндэсний статистикийн хороотой хамтарч ажиллаж байгаа учир хаяг нь тодорхой бүх хүүхдийг урьдчилсан бүртгэлд ороод, хамран сургах тойргийнхоо дагуу сургуулиудад хуваарилсан байгаа. Өөрөөр хэлбэл,  Сонгинохайрхан дүүргийн нэгдүгээр ангид элсэх 8400 хүүхдийг улсын бүртгэлд байгаа албан ёсны байршлын хаягаар нь ялгаж авсан. Тиймээс наймдугаар сарын 10-нд бүх дүүрэг, аймгийн хамран сургах тойргийн мэдээллийг Улсын бүртгэлийн ерөнхий газрын мэдээллийн санд байдгаар нь аваад, Боловсролын мэдээллийн технологийн төвийн системд оруулаад, шууд татаж авахаар бэлтгэл ажлаа хангасан. Харин наймдугаар сарын 12-16-ны хооронд аймаг, дүүргээр нь хороо тус бүрийн сургуулиуд нь өгөөд, тухайн сургууль нь Үндэсний статистикийн хорооны тооноосоо хаяг, байршил нь энэ байна гэсний дагуу хувиарласан байгаа. Ингээд тухайн хувиарласан хүүхдүүдээ эцэг, эхийнх нь хүсэлтийн дагуу баталгаажуулах ажил энэ сарын 19-25-ны хооронд явна. Иймээс энэ хугацаанд хаягны хувьд зөрчилгүй, асуудалгүй хүүхэд ямар нэгэн сургуульд очихгүйгээр шууд гар утаснаасаа бүртгэлтэй хэсэг рүү гээ шууд ороод, сургуулийн бүртгэлээ баталгаажуулах боломжтой. Ингээд энэ сарын 26-30-ны хооронд сургууль нь баталгаажсан хүүхдүүдээ анги, бүлэгт нь хувиарлагдсан мэдээллийн эцэг, эх рүү нь хариу өгөх систем үйлчилнэ. Өнөөдрийн байдлаар 45037 хүүхэд ямар нэгэн зөрчилгүй учраас тухайн сургуулийнхаа хамран сургах тойргийн дагуу сургуулиуддаа очсон байгаа. Өөрөөр хэлбэл, эцэг, эх хамран сургах тойргийнхоо аль нэг сургуульд сургана гэвэл хүсэлт баталгаажуулах процесс бэлэн болсон байна. Харин 31121 хүүхдийн бүртгэлийг хянаж байгаа. Түр түдгэлзүүлсэн 3138 хүүхэд байна. Бүртгэхээс татгалзсан 49000 хүүхэд байна" гэв.