Гавьяат тамирчин Б.Болдын нэрэмжит чөлөөт бөхийн мастеруудын Улсын аварга шалгаруулах тэмцээнд дархан аварга А.Сүхбат гурав давж, түрүүлсэн билээ. Азийн АШТ-ийн мөнгө, хүрэл, Зүүн Азийн наадмын мөнгөн медальт Гавьяат тамирчин А.Сүхбат “D” ангиллын 100 килограммын жинд барилдаж, үзэгч олныг баясгасан билээ. Тэрбээр 2000 оны насанд хүрэгчдийн улсын аваргад 97 килограммын жинд барилдаж байжээ. 23 жилийн дараа чөлөөт бөхийн дэвжээнд гарч, түрүүлсэн түүний сэтгэгдлийг хуваалцсан юм.

-Та чөлөөт бөхийн мастеруудын Улсын аварга шалгаруулах тэмцээнд олон жилийн дараа барилдаж, түрүүлсэн. Өнгөрсөн хугацаанд чөлөөт бөхийн бэлтгэлээ тасралтгүй хангаж байв уу?

     -Олон жилийн дараа чөлөөт бөхийн мастеруудын аварга шалгаруулах тэмцээнд ороход дурсамж сэргээд сайхан байлаа. Хамгийн сүүлд 2000 онд олимпод оролцох эрхийн төлөө барилдаж хүрэл медаль авч байсан. Түүнээс хойш чөлөөтийн өмсгөл өмсөж, дэвжээнд гараагүй юм байна. Гэхдээ би чөлөөтийн бэлтгэлээ алдалгүй хийсээр өнөөдрийг хүрсэн. Залуу насаа спортод зориулсан тамирчид байнгын бэлтгэлтэй байж, эрүүл мэндээ хамгаалах үүрэгтэй байдаг. Тэгэхгүй бол биед өөрчлөлт орж, асуудал үүсэх эрсдэлтэй. Сүүлийн тэмцээний үеэр алт, мөнгөн үеийн тамирчидтай уулзаж, залуучуудад зөвлөгөө өгч ярилцаад сайхан байлаа.

-Чөлөөт бөхийн мастеруудын Ерөнхийлөгчөөр ажиллаж байгаа. Мастеруудынхаа холбоог бэхжүүлэхийн тулд цаашид хэрхэн ажиллах вэ?

    -Дэлхийн бөхийн холбооноос 30 дахь удаагаа мастеруудын аварга шалгаруулах тэмцээн зохион байгуулсан байна лээ. Харин манай улс энэ жил зургаа дахь удаагаа улсын аварга шалгарч тэмцээн зохион байгуулж байна. Тэгэхээр их спортоо орхисон шилжилтийн үед мастеруудын холбоо чухал үүрэг гүйцэтгэх ёстой гэдгийг тамирчид ойлгосон байх. Тэгэхээр манай холбоо гишүүнчлэлдээ тамирчдыг өргөнөөр хамруулж хамтарч ажиллах бүрэн боломжтой. 21 аймагт салбар хороод байгуулах зорилготой ажиллаж байгаа. Ахмад тамирчдадаа сэтгэл зүйн болон эд материалын тусламж үзүүлээд эхэлчихсэн байна. 21 аймагт чөлөөтөөр барилддаггүй хүн байдаггүй. Тиймээс өсвөр үе, насанд хүрэгчид, мастеруудын насны хүмүүсийг ажиллах шаардлагатай байгаа юм.

-Мастеруудын дэлхийн аварга шалгаруулах тэмцээн удахгүй болох юм билээ. Та оролцох уу?

    -Ирэх аравдугаар сард Грек Улсад мастеруудын дэлхийн аварга шалгаруулах тэмцээн болно. Тус тэмцээнд Монголынхоо баг, тамирчдыг бэлтгэж оролцоно. Өнгөрсөн жил дэлхийн аварга шалгаруулах тэмцээнд манай багийнхан оролцсон. Хараахан аварга төрөөгүй байна. Энэ жил бүрэн бүрэлдэхүүнээрээ оролцохоор мастерууд бэлтгэлээ хангаж байгаа.

-Та алтын төлөөх барилдааныхаа талаар ярьж өгөөч?

    -Бүгд өөрсдийгөө бэлдэж орж ирсэн. Хүн хийдэг мэхээ их давтдаг юм байна. Би ч мөн адил хийдэг мэхээ амжилттай давтаж байж амжилт гаргалаа. Биеэ зөв авч явах юм бол тамирчин бүрд нөөц бололцоо байдаг гэдгийг сүүлийн тэмцээн харуулсан гэж бодож байна.