Үхсэн малын мах болон муудсан мах ресторан, цайны газар нийлүүлдэг гэх “Үүлэнгөү” компанийн талаар ХХААХҮЯ-наас мэдээлэл өглөө. Мэргэжилтний хэлснээр “Өнгөрсөн бямба гаригт мэргэжлийн хүмүүс Эмээлтэд хяналт шалгалт явуулсан. Биднийг очиход тус үйлдвэрт иргэдийн гаргасан гомдлын дагуу мөрдөн шалгах ажиллагаа явуулж байсан. Энэ сарын 7-ны өдрийн 00:02 цагт цагдаагийн шалгалт дуусаж,  Мал эмнэлгийн Ерөнхий газар, ХХААХҮЯ-наас маханд үзлэг хийж, үйлдвэрийн үйл ажиллагаатай танилцсан. Тухайн үйлдвэрийг бүрэн лацадсан бөгөөд махны дээжийг авч шинжилгээнд өгч, үлдсэн хэсгийг хөргүүрт хийсэн. Үйлдвэрийн удирдлага болоод ажилчдаас цагдаагийн байгууллага мэдүүлэг авч байгаа. Махнаас дээж авсан ч шинжилгээний хариу гараагүй байна. Үйлдвэрийн бүх гадна хаалгыг лацадсан бөгөөд 6-7 хаалгыг битүүмжилж мах оруулах боломжгүй болсон. Мөн зоорийг лацадсан. "Үүлэнгөү" компани нь 2022 оны зургадугаар сард хийсэн шалгалтаар үйл ажиллагааны дүгнэлтийн дагуу эрх нь цуцлагдсан байсан. Гэсэн ч хууль зөрчиж үйл ажиллагаа явуулж байсан учир хуулийн дагуу хариуцлага хүлээнэ” гэлээ.