УИХ 2023 оны төсвийн төсөл хэлэлцэж байгаатай холбогдуулан Хөдөлмөр, нийгмийн түншлэлийн гурван талт Үндэсний хороо талуудын саналаар ээлжит бусаар хуралдлаа.

   Хурлаар 2023 оны улсын төсвийн төсөлд төрийн албан хаагчдын цалин хөлсний талаар хэрэгжүүлэхээр тусгагдсан арга хэмжээ, төсвийн хэмжээ, хуваарилалтын зарчим, боломжуудын талаар  Үндэсний хорооны дарга, ХНХ-ын Сайд Т.Аюурсайхан танилцуулсан. Монголын Ажил Олгогч Эздийн нэгдсэн Холбоо, Монголын Үйлдвэрчний эвлэлийн холбоо байр сууриа илэрхийлж, оролцогч талууд санал солилцлоо.

    Үндэсний хорооны шийдвэрээр хөдөлмөрийн хөлсний доод хэмжээг 550 мянган төгрөг байхаар тогтоосон нь ирэх оны нэгдүгээр сарын 1-ний өдрөөс эхлэн мөрдөгдөх юм. Хөдөлмөрийн хөлсний доод хэмжээ болон инфляцтай уялдаж цалин хөлс нэмэх зайлшгүй шаардлага бий болж, ирэх оны төсвийн төсөлд 266,2 тэрбум төгрөгийг Төрийн албан хаагчдын цалингийн нэмэгдэлд тусгасан.

   Талууд, нэмэгдлийг зохистой хуваарилах, инфляцтай уялдуулах, цалин хөлс, нэмэгдэл урамшуулал тооцохдоо салбар салбараараа шийддэг асуудлыг зогсоож нэгдсэн нэг бодлоготой байх, Төрийн хэмнэлтийн тухай хуулийг буруу хэрэгжүүлж хууль тогтоомжид заасан нэмэгдлийг олгохгүй байгаа асуудлыг холбогдох эрх бүхий байгууллагад тавьж шийдвэрлүүлэх, хувийн хэвшлийнхний цалин хөлсний тогтолцоог судалж танилцуулах зэрэг саналыг хэлсэн.

   Улсын Их хурлаар ирэх оны төсвийн тухай хууль батлагдсан хойно хуваарилалтыг дахин хэлэлцэхээр боллоо.