Засгийн газрын ээлжит чуулганы үеэр Хөгжлийн банкнаас олгосон зээлийн эргэн төлөлтийн талаар мэдээлэл өглөө. Энэ үеэр Сангийн сайд Б.Жавхлан мэдээлэл өглөө. Тэрбээр “2021-2016 Хөгжлийн банкнаас Монгол Улсын хөгжлийн томоохон төслүүдийн санхүүжилтээр хангах ба санхүүжилтийн төсөл хөтөлбөрүүдийг хаврын чуулганаар батална гэж зохицуулсан байдаг. Хөгжлийн банкнаас санхүүжүүлэх төсөл хөтөлбөрүүдийг баталсан УИХ-ын 15 дугаар тогтоолыг 2011 онд баталсан байдаг. Үүнээс хойш Үндэсний аюулгүй байдлын гаргасан зөвлөмжийг үндэслэн Бодлогын зөвлөл нэртэй бондоос авч, тус зөвлөл бүх шийдвэрийг гаргадаг байсан. Ингээд 2012-2016 онд Засгийн газар дангаараа шийдвэр гарган өөрийн төсөл хөтөлбөрийг хэрэгжүүлэх зорилгоор төсөл хөтөлбөрийг шийдвэрлэсэн байна.

     Тодруулбал, 2012-2016 онд Засгийн газрын 120 тогтоолоор тухайн үеийн ханшаар 8.1 их наяд төгрөгтэй тэнцэх хэмжээний санхүүжилтийг Хөгжлийн банкнаас гаргуулахаар даалгаснаас 5.4 их наяд төгрөгийн зээлийн санхүүжилтийг олгосон байна. Тус тогтоол нь бүтээн байгуулалт, аж үйлдвэрийг дэмжих ТЭЗҮ нь бэлэн болоогүй төсөл нэртэй хувийн компаниудад санхүүжилт олго гэсэн тогтоол байна. Жишээлбэл, шинэ бүтээн байгуулалтыг дэмжих нэрээр тусгайлан нэр зааж дурдаад мөнгөн дүнг нь тогтоолд бичиж үүрэг болгосон байдаг. Шинэ яармаг орон сууцны хороололд 50 сая ам. доллар, төмрийн үйлдвэрийг дэмжих нэрийн дор Бэрэн группт нээлттэй санхүүжилт олгохыг Хөгжлийн банканд даалгасан байдаг. Засгийн газрын шийдвэр нь тухайлан нэр заасан компаниудад үүрэг өгөх байдлаар Ардчилсан ёсны зарчимд нийцэхгүй, төр нь хэн  нэгэнд илт давуу байдал бий болгосон байна. Хөгжлийн банкнаас олгож байсан санхүүжилт авсан компаниудын үйл ажиллагаа эхлээгүй зээл нь чанаргүй болж, Хөгжлийн банкны чанаргүй зээлийн багцын 74 хувийг эзэлж байна. чанаргүй зээлээс валют битгий хэл төгрөгөөр ч зээл төлөх боломжгүй байгаа. Бид улсын валютыг шавхаж гадаад дахь үүргээ гүйцэтгэж, Хөгжлийн банк, Засгийн газар бүхий аргаа ашиглан ажиллаж байна. Эргэн төлөлтийг хариуцах эзэнгүй Хөгжлийн банкны чанаргүй зээл бий болсон. Тухайлбал, Эгийн голын усан цахилгаан станцын төслийн нэгжийн зардал, аж үйлдвэрийн парк байгуулах төслийг Хөгжлийн банкнаас санхүүжүүлсэн. Гэвч төсөл хөтөлбөрүүд хэрэгжээгүй. Зөвхөн өр үлдсэн” гэлээ.