Европын холбоо Украины эрчим хүчний системийг дэмжихэд зориулан 25.5 сая еврогийн яаралтай тусламж олгож, эрчим хүчний тоног төхөөрөмжүүд шийдэж өгөхөөр болсон байна. Европын комисс ийм шийдвэр баталсныг тус байгууллагын албан ёсны цахим хуудсанд мэдээлсэн байна. Оросын агаарын цохилтод үлэмж сүйдсэн Украины эрчим хүчний дэд бүтцийг сэргээхэд тоног төхөөрөмжийн нөөц дутмаг байгааг салбарынхан нь мэдэгдэж байсан юм.

     Европын комиссын мэдэгдэлд “Орос, Украины эрчим хүчний дэд бүтцийг онилсон, эрчимтэй халдлага хийж байна. Сүүлийн долоо хоногууд болон саруудад тус улсын эрчим хүчний 30 хувь нь халдлагад өртөж сүйдээд байна. Европын холбоо болон холбооны гишүүн орнууд Украинд сая сая еврогийн эрчим хүчний тоног төхөөрөмж нийлүүлсэн боловч энэ дэмжлэгийн түвшинг дахин яаралтай нэмэгдүүлэх ёстой болж байна” гэж дурджээ. Ойрын өдрүүдэд Европын комисс Украины эрчим хүчний яамтай хамтран дэмжлэгийг цаашид нэмэх чиглэлд зорилтот аян эхлүүлэхийг мөн дурдсан байна. Үүний өмнө Украины Ерөнхийлөгч Володимир Зеленский Европын холбооны эрчим хүчний асуудал эрхэлсэн дээд төлөөлөгч, хатагтай Кадри Симсоныг Киевт айлчлах үеэр нь хүлээн авч уулзсан байна. Энэ үеэр Ерөнхийлөгч Володимир Зеленский Украины байгууламжуудад өгч байгаа Оросын цохилтуудын улмаас улсынх нь эрчим хүчний дэд бүтэц 30-40 хувь гэмтэж, сүйдсэн гэдгийг мэдэгджээ.

      Оросын талаас сүүлийн хэдэн долоо хоногт Украины иргэний дэд бүтэц, тэр дундаа эрчим хүчний байгууламжийг онилсон цохилт өгч байгаа үед Симсоний Киев дэх айлчлал болсон. “Украинд асар их эвдрэл сүйдэл учирсныг нүдээр үзсэний хувьд санхүү, техник болоод бусад бодит тусламжийг нэмэгдүүлэхийг бүх талаар хичээн ажиллана” гэж тэрбээр "твиттер" хуудсаараа мэдээлжээ. Ийм нэмэлт тусламжийг Европын холбооны байгууллагууд, гишүүн орнууд, олон улсын түншүүд болон хувь хандивлагчдаас бүрдэх учиртайг тэрбээр мөн дурдсан байна. Үүний зэрэгцээ 7-ийн бүлгийн орнуудын Гадаад харилцааны сайд нар Германы Мюнстрт хийх уулзалтаараа Украинд үзүүлэх цаашдын дэмжлэгийг хэрхэн зөв зүйтэй зохицуулах асуудлыг голлон хэлэлцэх гэж буй юм байна.