ШШГЕГ-ын харьяа 405 дугаар ангид хоригдож байсан 25 настай иргэн Б-г хорих ангийн ажилтнууд зодож, дунд чөмгийг нь хугалсан гэх мэдээлэл хэвлэл мэдээллийн хэрэгслээр цацагдсан. Энэ талаар ШШГЕГ-ын мэргэжилтнээс тодрууллаа. Тэрбээр “Энэ талаарх асуудлыг Сонгинохайрхан дүүргийн цагдаагийн газар болон Прокурорын газраас шалгаж байгаа. Тийм  учраас дэлгэрэнгүй мэдээлэл өгөх боломжгүй байна. Гэмтсэн гэгдэж буй хоригдол чанга дэглэмтэй 405 дугаар ангид байгаагүй. Харин тус хорих ангийн аж ахуйд ажилладаг байсан юм. Тэрбээр ял эдлэхээсээ өмнө бэртэл, гэмтэлтэй байсан юм билээ. Өнгөрсөн аравдугаар сард бие нь өвдөж хорих ангийн эмчид үзүүлж, эмнэлэгт хэвтсэн. Шалгалтын ажиллагаа үргэлжилж байгаа учраас хэн нэгэнд зодуулсан эсэх нь тодорхойгүй байна” гэлээ.