Завхан аймгийн халаалтгүй хүйтэн эмнэлгийн өрөөнд дөнгөж төрсөн эмэгтэйчүүд гам алдаж, нялх биетэй ээжүүд хөнжлөөрөө хучаад хүүхдээ хөхүүлж байгаа зураг цахим орчинд тархсан. Тиймээс иргэд, олон нийтийн зүгээс “Хурдан арга хэмжээ авч, эрүүл мэндийн салбарт хөрөнгө оруулах хэрэгтэй байна” хэмээн шүүмжилсэн билээ.

    Тэгвэл бид эмнэлгийн дулаан хангамжийн үйл ажиллагаа хэвийн болсон эсэх  талаар тус аймгийн Засаг дарга Б.Түвшинжаргалаас тодрууллаа.

     Тэрбээр  “Манай аймаг 20  орчим уурын зуухтай. Байгууллага бүр нэг уурын зуухтай гэж болно. Галч нарын галлагаанаас шалтгаалж байгууллагын халаалтын асуудал шийдэгддэг. Тухайн өдөр галлагаа муутай байсан юм билээ. Тэгээд нялх биетэй ээжүүд хөнжлөө нөмрөөд хүүхдээ хөхүүлж байхад нь эмч нь зураг авч тараасан байсан. Тухайн үед арга хэмжээ авч, эмнэлгийн халаалтыг хэвийн болгосон” гэлээ.