“No Double Standard” хөдөлгөөний гишүүн Д.Монголхүүг Сүхбаатар дүүргийн цагдаагийн хэлтэс баривчилсныг эсэргүүцсэн иргэд ХЗДХЯ-ны гадаа жагссан. Үүнтэй холбоотойгоор ЦЕГ-ын дарга, дотоодын цэргийн командлагч, хошууч генерал Ж.Болд мэдээлэл өгсөн. Тэрбээр “Өнгөрсөн сарын 18-наас хойш нэр бүхий иргэд Сүхбаатарын талбай болон Ялалтын талбайд жагсаал зохион байгуулсан. Есдүгээр сарын 30-ны жагсаалын үеэр төв талбай руу хайрцагтай эд зүйл оруулах гэхээр нь цагдаагийн алба хаагч хууль ёсны шаардлага тавьсан. Олон нийт цугласан энэ үед оруулж болдог, болдоггүй зүйл гэж байдаг. Үүний дагуу шаардлага тавихад Д.Монголхүү хууль ёсны шаардлагыг эсэргүүцэж, цагдаагийн алба хаагчийн биед нь халдсан. Энэ хэргийг шалгахаар Сүхбаатар дүүргийн цагдаагийн нэгдүгээр хэлтэс рүү түүнийг авч явсан.

     Иргэн Д.Монголхүү  гурван удаагийн Зөрчлийн хэрэг дээр шалгагдаж байгаа. Д.Монголхүү цагдаагийн байгууллагаас дуудахад хүндэтгэн үзэх шалтгаангүйгээр удаа дараа ирдэггүй болохоор прокурорын зөвшөөрлөөр баривчилсан. Гэтэл шөнийн 02:30 цагт иргэн Э.Одбаяр болон бусад нэр бүхий иргэд төрийн онцгой объект буюу Цагдан хорих 461-р анги  руу халдан Д.Монголхүүг авч явсан” гэсэн юм.

Бид Цагдан хорих байрнаас хүн авч гарсан гэх мэдээллийн дагуу ШШГЕГ-ын Хэвлэл мэдээлэл, олон нийттэй харилцах төвийн дарга, хошууч Х.Баясгалангаас тодрууллаа.

Тэрбээр “ Шүүхийн шийдвэр гүйцэтгэх ерөнхий газрын харьяа Хорих 461 дүгээр ангийн Цагдан хорих байрнаас Д.Монголхүүг авч гарсан гэх мэдээлэл нь худал. Тус ангийн шалган нэвтрүүлэх байрны хүлээж авах хэсэгт иргэд, өмгөөлөгч, Цагдаагийн байгууллагын алба хаагчдын хооронд маргаан үүссэн.  Үүнтэй холбоотойгоор мөрдөн шалгах ажиллагаа явагдаж байгаа тул дэлгэрэнгүй мэдээлэл өгөх боломжгүй” гэсэн юм.

      Мөн Цагдан хорих 461 дүгээр ангид хоригдож байгаа Э.Одбаяр өлсгөлөн зарласан гэх мэдээлэл бий. Энэ талаар тодруулахад “Цагдан хорих таслан сэргийлэх арга хэмжээ авагдсан Э.Одбаяр өлсгөлөн зарлаагүй. Уг мэдээлэл нь ташаа мэдээлэл” гэсэн юм.