-Газрын биржийн цахим системийг нэвтрүүлснээр улсын төсөвт төвлөрүүлэх орлогын хэмжээ 2-3 хувиар нэмэгдсэн-

       Иргэн болон хуулийн этгээд Газрын биржийн цахим систем (www.mle.mn)-ийг ашиглан газрын дуулага худалдаа, төсөл сонгон шалгаруулалтад оролцож, газар өмчлөх, эзэмших, ашиглах боломжтой болжээ. Энэ онд улсын хэмжээнд 1910 газрын дуудлага худалдаа, 110 төсөл сонгон шалгаруулалтыг Газрын биржийн цахим системээр дамжуулан зохион байгуулна. Тухайлбал, ирэх дөрөвдүгээр сарын 7-нд нийслэлд 14 байршилд дуудлага худалдаа зохион байгуулах аж. Энэ талаар Газар зохион байгуулалт, геодези зураг зүйн газрын Кадастрын хэлтсийн мэргэжилтэн Ж.Баянмөнх “2020 оны жилийн эцсийн өссөн дүнгээр нийт 6746 газрын дуудлага худалдаа, 431 газар эзэмшүүлэх төсөл сонгон шалгаруулалтыг зохион байгуулж, 11798 иргэн, хуулийн этгээд үйлчилгээ авсан байна. Газрын биржийн цахим системийн хэрэглээнд нэвтрүүлэхээс өмнө газар өмчлөх, эзэмших, ашиглах эрхийн дуудлага худалдааг танхимаар явуулдаг байх үед жилд дундажаар дөрвөн тэрбум төгрөгийг улсын төсөвт төвлөрүүлдэг байсан. Харин Газрын цахим биржийн системийг нэвтрүүлснээр орлогын хэмжээ 2.3 хувиар нэмэгдэж, 2020 оны байдлаар 10.5 тэрбум төгрөгийг улсын төсөвт төвлөрүүлсэн. 

       Уг системийг 2016 оноос эхлэн ашиглаж байгаа бөгөөд шинэчилсэн хувилбарыг нь 2020 оноос эхлэн үйл ажиллагаанд нэвтрүүлээд байна. Газрын биржийн цахим системийн гол зорилго нь газар өмчлөх, эзэмших, ашиглах эрхийн дуудлага худалдаа, төсөл сонгон шалгаруулалтыг цахим хэлбэрээр ил тод, нээлттэй, зохион байгуулах, газрын зах зээлийн үнийн мэдээллийг цуглуулах, газар үл хөдлөх хөрөнгийн зах зээлийн нэгдсэн систем бий болсон юм. Энэ системийг 21 аймгийн Газрын харилцаа барилга, хот байгуулалты газар болон нийслэл, дүүргийн Газар зохион байгуулалтын алба, 330 сумын даамлууд үйл ажиллагаандаа ашиглаж байна. Мөн БОАЖЯ, эдийн засгийн чөлөөт бүсүүдэд дуудлага худалдаа, төсөл сонгон шалгаруулалтаар газар олгохдоо энэ системийг ашиглаж байгаа. Ер нь бол газартай холбоотой, газрын зах зээлийг нэг цэгт төвлөрүүлсэн гэсэн үг.

     Газар худалдаж авах буюу хөрөнгө оруулалт хийх гэж байгаа иргэн, хуулийн этгээд mle.mn буюу Газрын биржийн цахим системд хэрэглэгчээр нэвтэрч, дуудлага худалдаа, төсөл сонгон шалгаруулалтад оролцох, өөрийн өмчийн газраа худалдах, түрээслэх зараа үнэ төлбөргүй байршуулж, бусдад шилжүүлэх болон дуудлага худалдаагаар бусдад худалдах боломжтой. Өөрөөр хэлбэл, иргэд энэ цахим системийг ашиглан олон хүн цугларсан газарт очихгүйгээр гэрээсээ газар өмчлөх, эзэмших, ашиглах эрхтэй болох боломжтой” хэмээн ярилаа.

     Мөн газар худалдан авах, хөрөнгө оруулалт хийх гэж буй иргэн, хуулийн этгээд тус системээс газрын кадастр, газар зохион байгуулалтын төлөвлөгөө, газрын төлөв байдал, инженер геологи, гео-экологийн талаарх газартай холбоотой бүх төрлийн мэдээллийг авч газарт хөрөнгө оруулалт хийх боломжтой аж.