Улсын драмын эрдмийн театрын уран бүтээлчид жил бүрийн дэлхийн театрын өдөр буюу гуравдугаар сарын 27-нд театрын үе үеийн уран бүтээлчдээрээ уулзан, хөгжил, дэвшлийн тухай ярилцаж, хэлэлцүүлдэг уламжлал өнгөрсөн жилээс тогтсон билээ. Тэгвэл энэ жилийн хэлэлцүүлэг “УРЛАГ БОЛ ЭНХ ТАЙВАН” уриан дор өчигдөр тун амжилттай болж өндөрлөлөө. Хэлэлцүүлэгт Улаанбаатар хотод үйл ажиллагаа явуулж байгаа 12 театрын удирдлага болон найруулагч, уран бүтээлчид оролцсон юм. Тухайлбал, Ардын жүжигчин П.Цэрэндагва, Н.Сувд, Б.Жаргалсайхан, МУГЖ З.Жарантав, Б.Тунгалаг, Г.Равдан, Ардын багш Н.Ганхуяг, Урлагийн гавьяат зүтгэлтэн Ч.Найдандорж, Төрийн шагналт, найруулагч Н.Наранбаатар тэргүүтэй уран бүтээлчид оролцсон юм. Хэлэлцүүлэгт уран бүтээлчдийн зүгээс дуу нэгтэйгээр гаргасан санал нь театр урлагийн зөвлөлтэй болох. Ингэснээр энэ төрлийн цаашдын хөгжилд илүү ахиц дэвшилт гарах тухай ярьсан юм.

-УДЭТ-ЫН ЗАХИРАЛ Д.ЦЭРЭНСАМБУУ: ЭНХ ТАЙВАН, ДАЙН ДАЖИНГҮЙ БАЙЛГАХ ГОЛ ҮНДЭС БОЛ ТЕАТР-

           Энэ үеэр УДЭТ-ын захирал Д.Цэрэнсамбуу “Монгол Улсад шинэ цагийн театрын урлаг үүсэн хөгжөөд 90 гаруй жил болж байна. 1961 онд Францын нийслэл Парис хотод олон улсын театрын томоохон хурал болсон. Нийт 40 гаруй үндэсний төлөөлөл оролцсон. Энэ уулзалтад дэлхийн нийтийг энх тайван, дайн дажингүй байлгах, улс үндэстнүүд харилцан ойлголцох үндсийг бэхжүүлэхэд  театрын урлаг чухал юм гэсэн зорилгыг дэвшүүлсэн. Монгол Улсын хувьд 1990 оноос хойш олон улсын театрын баярыг янз бүрийн хэлбэрээр тэмдэглэж ирсэн. Тухайлбал, театрынхаа урын санд байгаа дэлхийн соёл, үндэстэнд хүлээн зөвшөөрөгдсөн сонгодог утгатай уран бүтээлээ олон улсын театрын өдөрт зориулан үзэгчиддээ хүргэж, бэлэг барьсан гэх мэтээр тэмдэглэн ирсэн” гэв.

-НАЙРУУЛАГЧ Ч.НАЙДАНДОРЖ: ҮНДЭСНИЙ ТЕАТРТАЙ БАЙНА ГЭДЭГ ХҮНТӨРӨЛХТНИЙ ОЮУН САНААНД ХАМГИЙН НӨЛӨӨТЭЙ-

        Харин Урлагийн гавьяат зүтгэлтэн, найруулагч Ч.Найдандорж “Ямар ч улс үндэстэн өөрийн хэл, соёлоо хадгалсан үндэсний театртай байна гэдэг хүнтөрөлхтний оюун сэтгэлгээнд их чухал нөлөөтэй. Тиймээс ХХ зуунд манай алтан үеийнхэн маш үсрэнгүй хөгжлийг хийж, нүүдэлчдийнхээ оюун сэтгэхүйд маш том хувьсгалын дайтай өөрчлөлтийг авчирч чадсан. Өөрөөр хэлбэл, мэргэжлийн жүжигчин, мэргэжлийн байртай, дэлхийн хүнтөрөлхний утга зохиолын өв сангаас сорчилж, Монголын оюун санаанд авчирч хийснээрээ том гавьяатай. Харин цаашид авьяаслаг залуус гал алдахгүй хөгжүүлж, болж өгвөл дэлхийн түвшинд гаргах нь чухал" гэсэн нь онцлог байв. Улсын драмын эрдмийн театрын дунд үеийн уран бүтээлчид хэлэлцүүлэгт сууж, ахмад уран бүтээлчдийнхээ үгийг сонсож байв.

-ЖҮЖИГЧИН М.ТОГТОХЖАРГАЛ: ХУВИЙН ТЕАТРУУД ШИНЭЭР ТӨРЖ, ӨӨРСДИЙН УРАН БҮТЭЭЛИЙГ ХҮРГЭЖ БАЙГААД БАХДАМ БАЙНА-

        Соёлын тэргүүний ажилтан, жүжигчин М.Тогтохжаргал "Театрын баяр бол уран бүтээлч бидний хувьд хамгийн сайхан баяр. Тэр дундаа бид энэ өдөр жаргал, зовлон, нийгмийн асуудлаа ярьж, хэлэлцэж, мөн дэвшилттэй, хөгжиж байгаа зүйлээ ч бахдан ярьдаг. Театр маань засвар хийгдээд ажил хэсэг завсарласан болохоор тайзаа их санасан байна. Энэ хугацаанд мэдээж бид зүгээр суухгүй шүү дээ. Миний хувьд Завхан аймгийн Хөгжимт драмын театртай хамтран тайзнаа хүргэж буй "Асрын өндөр" жүжигт тоглож байгаа. Орон нутгийн театрын уран бүтээлчидтэйгээ ажиллах ямагт сайхан байдаг.  Түүнээс гадна сүүлийн үед хувийн театрууд олон төрж, өөрсдийн гэсэн уран бүтээлийг хүргэж байгаад уран бүтээлчийн хувьд баяртай, бахархам сайхан байна" гэсэн юм. 

"МОНГОЛ ТЕАТР"-ЫН НАЙРУУЛАГЧ А.ЧИНГҮҮН : УРАН БҮТЭЭЛЧИД НЭГНЭЭ ДЭМЖИЖ, УРАМ ХАЙРЛАДАГ БАЙХ НЬ ЧУХАЛ БАЙНА

             "Монгол театр"-ын найруулагч А.Чингүүн "Шинэ театрт уран бүтээлч нөхөдтэйгээ нэгэн зорилгын төлөө ажиллаж байгаа залуу хүний хувьд боддог нэг зүйл бол уран бүтээлчид бид нэг нэгнээ дэмжих хэрэгтэй. Нэгнийхээ хийсэн зүйлийг очиж үздэг, дэмждэг, урам хайрладаг байх нь зүйтэй юм байна. Мэдээж шүүмжээ хэлнэ. Ингэж нэгнээ дэмждэг байж бид цаашаа илүү хөгжих юм байна" гэв. 

"ОРФЕЙ" ТЕАТРЫН ЗАХИРАЛ Т.АРИУНЧИМЭГ: МЭРГЭЖЛИЙН ТЕАТРЫГ БИЙ БОЛГОНО ГЭВЭЛ МЭРГЭЖЛИЙН ШААРДЛАГА ХАНГАСАН БОЛОВСОН ХҮЧИН БИЙ БОЛГОХ НЬ ЗҮЙТЭЙ БАЙХ

             "Орфей" театрын захирал Т.Ариунчимэг "Хувийн театрын зүгээс харахад өнөөдөр театрт мэргэжлийн хэчнээн хүн байна вэ. Тухайлбал, жижиг хэрэглэлийг хариуцсан мэргэжлийн боловсон хүчин бэлтгэдэг сургууль бий юү. Гэрлийн мэргэжлийн найруулагч, хувцасны зураач хэрхэн төрж байна. Илүү мэргэжлийн театрыг бий болгоно гэвэл мэргэжлийн шаардлагыг хангасан боловсон хүчин бий болох болов уу" гэв.