Харшлын эмч нарын мэдээлж буйгаар ургамлын харшлын улирал дараах гурван үе шаттай явагддаг

I үе дөрөв,таван сар: Модлог ургамлын харшил буюу хус, бургас, нар мод

II үе зургаан сар: Үет ургамлын харшил буюу  хөх тариа, арвай, ерхөг, согоо үр

III үе долоон сар буюу хогийн ургамлын харшил  агь, шарилжний харшил хөдөлдөг байна

Түүнчлэн зуны улиралд нарны туяанаас үүдэлтэй нарны харшил ч цөөнгүй хүнд илэрдэг. Нарны шууд тусгалаас болж арьсан дээр тууралт гарах, загатнах, улайх шинж тэмдгээр илэрдэг байна.

Харшлын шинж тэмдэг, хэрхэн сэргийлэх вэ?

Харшлын үед ам, хамар, нүдний салстаар ургамлын тоос орсноор:

 Нус гоожих, хамар битүүрэх, нүд загатнах, улайх,  найтаах, ханиах, амьсгал давчдах зэрэг шинж тэмдэг илэрдэг.

Харшлын эмч О.Урангоо: “Эдгээр шинж тэмдэг илэрсэн тохиолдолд заавал мэргэжлийн эмчид хандаж оношлуулан, зохих эмчилгээ хийлгэх нь хамгийн чухал. Хүндрэлээс урьдчилан сэргийлэхийн тулд гадаа гарахдаа маск зүүх, нарны шил хэрэглэх, хувцсаа ойр ойрхон сольж угаах зэрэг энгийн механик аргуудыг ч давхар хэрэглээрэй” гэв.

Харшлын үед эмчийн зөвлөсөн харшлын эм, хамрын цацлага зэргийг зөв тунгаар, тогтмол хэрэглэх нь харшлын зовуурийг бууруулж, хүндрэлээс сэргийлэхэд чухал нөлөөтэй.

Эмчлээгүй харшил хүндрэл дагуулдаг

Хэрэв харшлын шинж тэмдгийг тоохгүй явбал амьсгал боогдох, багтраа өвчин (астма)-д шилжих эрсдэл өндөр байдаг. Мөн хүүхдийн харшилд онцгой анхаарах шаардлагатайг эмч онцоллоо. “Хүүхдийн ургамлын харшил дөрвөн наснаас эхэлж үүсдэг. Хэрэв бага наснаас нь эмчилгээ хийлгүй явбал архагшиж, насанд хүрэхэд бусад харшлын өвчинд өртөх, хүнд хэлбэрийн астма өвчтэй болох эрсдэл бий” .

Тиймээс харшлын шинж тэмдэг илэрмэгц мэргэжлийн эмчид үзүүлж, урьдчилан сэргийлэх арга хэмжээ авч, зуны улирлыг зовиргүй даван туулах боломжтой гэдгийг эмч нар зөвлөж байна.