Монголын хөнгөн атлетикийн холбоо, "Тал нутгийн марафон” ТББ-тай хамтран гүйлтийн олон улсын тэмцээнийг уламжлал болгон жил бүр зохион байгуулдаг билээ. Энэ жил 28 дахь удаагаа зохион байгуулагдсан "Тал нутгийн марафон-2025" тэмцээн Хүй долоон худагт есдүгээр сарын 14-ний өдөр боллоо. “Тал нутгийн марафон-2025” гүйлтийн тэмцээний 5 км-ийн зайн гүйлтэд амжилттай уралдаж хоёрдугаар байрт орж, мөнгөн медаль хүртсэн, “Mongolia Elite Runners” клубийн залуу тамирчин, Отгондоржийн Оюунбаяртай ярилцлаа.

 –“Тал нутгийн марафон”-д амжилттай уралдсанд баяр хүргэе.

         -Баярлалаа. Энэ жилийн “Тал нутгийн марафон” сайхан зохион байгуулагдаж, амжилттай өндөрлөлөө.

–Ямар, ямар зайд уралдаж, хэдэн медаль хүртэв ээ?

       -Би энэ удаагийн “Тал нутгийн марафон” гүйлтийн тэмцээнд 5 км-ийн зайн гүйлтэд уралдаж хоёрдугаар байр эзэллээ.

 –“Тал нутгийн марафон”-д гадны орны тамирчид уралдсан уу?

        -Тийм ээ. Энэ жилийн тэмцээнд Япон Улсын тамирчид өмнөх жилүүдээс илүү олноор оролцлоо.

-Миний дүү өөрийгөө танилцуулахгүй юу?

     -Намайг Отгондоржийн Оюунбаяр гэдэг. Би 22 настай, эрхзүйч мэргэжилтэй. Хөнгөн атлетикийн тамирчин.

- Аль аймаг, хотод төрсөн хүүхэд вэ?

      -Би Ховд аймгийн Мөст суманд төрж, өссөн.

-Хөнгөн атлетикийн ямар клуб, спорт хорооны тамирчин бэ?

     -Би 2025 оноос “Mongolia Elite Runners” клубт бэлтгэл, сургуулилалтаа хийж, мэргэжлийн багш, дасгалжуулагчийн удирдлага дор холын болон дундын зайн гүйлтийн бэлтгэл хийж байгаа.

-Спортын ямар зэрэг, цолтой вэ?

    - Хэ, хэ, хэ, баярлалаа. Одоогоор хөнгөн атлетикийн спортын ямар нэгэн зэрэг, цол байхгүй. Би шинэ залуу тамирчин, илүү мундаг болохын төлөө хичээж байна.

–Хөнгөн атлетикийн холын зайн гүйлтийн төрлөөр хэд дэх жилдээ хичээллэж байгаа бэ?

     -Энэ жилээс мэргэжлийн багшийн удирдлага дор системтэйгээр хичээллэж эхэлсэн.

 -Яагаад тэсвэр хатуужил шаардсан дундын болон холын зайн гүйлтийн төрлийг сонгож хичээллэх болсон юм бэ?

    -Энэ төрлийг сонгоход Үндэсний шигшээ багийн тамирчин, олимп, дэлхийн аварга шалгаруулах тэмцээний марафон гүйлтэд оролцогч, ОУХМ Б.Мөнхзаяа эгч чухал нөлөө үзүүлсэн. Мөн Үндэсний шигшээ багийн тамирчин, олимп, ДАШТ-ий марафон гүйлтийн оролцогч, ОУХМ Д.Гантулга ах энэ спорт энэ төрлийг сонгоход маш том түлхэц болсон.

   Энэ хоёр сайхан тамирчин, надад холын зайн гүйлтийн хүнд хэцүү тал хийгээд онцлогийг надад ойлгуулсан. Зөвхөн боломж төдийгүй, үлгэр жишээ болж, өөрсдөөрөө батлан харуулсан тамирчид байгаа юм. Холын зайн гүйлт бол зөвхөн хурд бус, сэтгэлийн хат, хатуужил, тэсвэр, тэвчээр шаарддаг төрөл. Тамирчин 100 хувь өөртөөгөө ажиллахыг шаарддаг онцлогтой төрөл байгаа юм. Би өөрийгөө сорьж, өөрийн хязгаарын түвшнийг давж, бие бялдар, оюун санаагаа хөгжүүлэхийн тулд энэ төрлийг сонгон хичээллэж байгаа.

-Хөнгөн атлетикаар хичээллэсэн үеэс хойших томоохон амжилтаасаа сонирхуулахгүй юу?

    -“Улаанбаатар марафон”, “Дархан марафон”, “Сэлэнгэ марафон”, Увс аймагт болсон кросс гүйлтийн улсын аварга шалгаруулах тэмцээн, “Булган марафон”-оос авхуулаад өнөөдөр оролцсон “Тал нутгийн марафон” гээд оролцсон бүх тэмцээн маань миний хувьд том тэмцээнүүд байлаа.

 -Холын зайд гүйхийн аз жаргал, сэтгэл ханамж юу байдаг вэ?

     -Холын зайд гүйх нь бие болон оюун санааны тэсвэрийг сорьж, өөрийгөө даван туулах боломжийг олгодог. Уралдаанд амжилт гаргах, хувийн амжилтаа шинэчлэх үед ирдэг аз жаргал, сэтгэл ханамж нь миний тамирчны замналын хамгийн том урам зориг болдог.