“Загреб-2025” чөлөөт бөхийн насанд хүрэгчдийн ДАШТ-ий эхний өдөр Монголын дөрвөн бөх хүч сорин өрсөлдөв. ДАШТ-ий хүрэл медальт, гавьяат тамирчин Төмөр-Очирын Тулга 70 кг-ын жингийн хагас шигшээд шалгараад байна.  МУГТ Т. Тулга эхний тойрогт Молдавын Дикон Василег 2:0-ээр, хоёрдугаар тойргийн барилдаанд  Болгарын Георгиев Илиевийг даралтаар цэвэр ялж, шигшээ наймд үлдсэн. Тэрбээр дөнгөж саяхан Гүржийн бөх, Европын аваргын мөнгө, хүрэл медальт Акаки Кемертелидзег 11:0 оноогоор цэвэр ялж, хагас шигшээд шалгарлаа.  Т.Тулга тун удахгүй 23:30 цагаас Казахстаны бөх, ДАШТ-ий алт, мөнгөн медальт, Азийн гурван удаагийн аварга Нуркожа Кайпановтай хүч сорино.