Чөлөөт бөхийн насанд хүрэгчдийн эрэгтэйчүүдийн 57, эмэгтэйчүүдийн 36 дахь удаагийн ДАШТ Хорват Улсын нийслэл Загреб хотод өнөөдөр эхэлнэ.  Монгол Улсын шигшээ баг 2007 оны ДАШТ-ээс эхлэн тасралтгүй 17 ДАШТ дараалан медаль авсан амжилтаа үргэлжлүүлхийн төлөө барилдах юм.

    Манай Улс чөлөөт бөхийн ДАШТ-нд 1963 оноос оролцож эхлэн 1967 онд анхны медалиа авснаас хойш долоон алт 28 мөнгө, 44 хүрэл нийт 79 медаль авсан амжилт нь олимпын төрлүүдээс ДАШТ-нд Монголын хамгийн олон медаль авсан төрөл болжээ. Энэ удаагийн ДАШТ өдөр бүрийн 16:30 цагаас эхэлж шигшээ барилдаан 23 цагаас явагдах болно.

   Өнөөдөр эрэгтэй чөлөөт бөхийн 61,70,86,125 кг гэсэн дөрвөн жингээр эхэлнэ. Манай улсаас 61 кг-д ДАШТ-ий хүрэл медальт, ОУХМ Түмэнбилэгийн Түвшинтулга,  70 кг-д ДАШТ-ий хүрэл медальт, Азийн наадмын аварга, МУГТ Төмөр-Очирын Тулга,  86 кг-д Азийн залуучуудын хошой аварга, залуу тамирчин, Наадамбатын Батбилгүүн, 125 кг-ын жинд ДАШТ-ий мөнгө, хүрэл медальт, МУГТ Мөнхтөрийн Лхагвагэрэл нар өрсөлдөнө.