“Ахиллис Монгол” олон улсын байгууллагаас жил бүрийн есдүгээр сарын гурав дахь  долоо хоногийн бямба гарагт уламжлал болгон марафон гүйлтийг зохион байгуулдаг болсон билээ.  Энэ удаагийн "ИТГЭЛ НАЙДВАР, БОЛОМЖ-УЛААНБААТАР-2025" марафон гүйлтийн тэмцээн  есдүгээр сарын 20-ны бямба гарагт Үндэсний цэцэрлэгт хүрээлэнд зохион байгуулагдана.

      Тус марафон эрүүл амьдралын хэв маягийг дэмжиж, хөгжлийн бэрхшээлтэй иргэдийн нийгмийн оролцоог нэмэгдүүлэхэд дэмжлэг үзүүлэн бусдад урам зориг итгэл найдвар түгээх зорилготой юм. Марафон 5, 10, 21, 42 км, тэргэнцэртэй 1500 м, гар дугуй 21 км-ийн зайд уралдана. Тэмцээний 10, 21, 42 км-ийн марафон гүйлтэд зургаан насны ангиллаар, 5 км-ийн зайн гүйлтэд насны ангилалгүй эрэгтэй, эмэгтэй, хөгжлийн бэрхшээлтэй иргэд оролцох боломжтой.