Парисын зуны олимпын наадмын дараагаар Японы зарим алдартай бөхчүүд дүрмийг өөрчлөх хэрэгтэй гэдэг санал гаргажээ.  Тэд “IJFжүдо бөх  Европын жүдо болжээ. Японых биш. Бид аль ч дүрмээр нь барилдаж чадна. Гэхдээ бид өөрсдийнхөө барилддагаараа барилдмаар байна” санал гаргасан байна. Үүний дараагаар япончууд дотооддоо зохиох тэмцээндээ өөр дүрмээр барилдах тухай яриа гарч байлаа.

      Үүнийг ч дагаад тэрүү, Олон улсын жүдо бөхийн холбоо дүрэмдээ өөрчлөлт оруулахаар боллоо. Дүрэм яаж өөрчлөгдсөн тухай зарим мэдээллийг харвал хөл авах, хөлд хүрэхийг тодорхой хэмжээнд зөвшөөрсөн байна. Хөлд гараар хүрэх, хөл авахыг хориглочихоод байсан. Тэгвэл шинэ дүрмээр хийсэн мэхний залгаас болгож хөл авах, хөлд хүрэхийг зөвшөөрсөн байна.

       Мөн торгуулийн системийг өөрчилж, татамиас гарсан болон түлхүүлж гарсан тохиолдолд торгодгийг болиулжээ. Үүнээс гадна мэх нисэлттэй хурдтай мэх хийхдээ толгой дээрээ бага зэрэг зоогдож эргэсэн бол хансокү-макэ гэж үзэхээргүй болжээ.

Олимпын хүрэл медальт Грекийн Фёдор Целидис дүрмийн шинэчлэлийн талаар бодлооо хэлэхдээ “2012 оны олимпынх шиг хөл авахыг зөвшөөрчихвөл сайхан л байна. Татамиас гарах, түлхэхэд торгохоо больсон нь ч зөв. Гэхдээ тамирчид санаатайгаар татамиас зугтаж гараад байвал яаж шийдэхээ тооцох хэрэгтэй. Мэх хийхдээ толгойгоороо бага зэрэг зоогдоход хансокү-макэ өгч байсныг би угаасаа ойлгохгүй, дэмждэггүй байсан” гэжээ.

         АНЭУ-ын нэрийн өмнөөс барилдаж буй Махмадбек Махмадбеков “Хөл авахыг нэмчихвэл барилдаан бүхэлдээ өөрчлөгдөнө. Татамиас гарахад торгохгүй болно гэдэг хачин санагдлаа. Ялж  яваа бөх чөлөөтэй зугтах, барилдаанаас зайлсхийх боломжтой болчих юм биш үү” хэмээн өгүүлсэн байна.