Практик буудлагын спортын карабины төрлийн дэлхийн аварга шалгаруулах тэмцээн 2024 оны наймдугаар сарын 4-9-ний өдрүүдэд Финланд Улсын Оулу хотноо болжээ. Дэлхийн 130 гаруй улсад түгэн дэлгэрсэн практик буудлагын спорт нь есөн төрлийн зэвсэг ашигладаг байна. Дэлхийн аварга шалгаруулах тэмцээн нь дөрвөн жилд нэг удаа зохион байгуулдаг аж.

       Карабины дэлхийн аварга шалгаруулах тэмцээн нь гурав дахь удаагаа болж байгаа юм. Энэ удаагийн тэмцээнд Монголын баг, тамирчид амжилтаа ахиулж гурван алт, нэг мөнгө, хоёр хүрэл медаль хүртсэн байна.  Гар цэнэглэлттэй опен ангилалд спортын мастер Содномжамцын Дашдэмбэрэл түрүүлж алтан медаль,

гар цэнэглэлттэй опен ангилалд багийн дүнгээр Монголын баг (спортын мастер С.Дашдэмбэрэл, спортын мастер Г.Наран-Очир, спортын мастер Э.Эрдэнэхалиу, олон улсын хэмжээний мастер Д.Энхбаатар нар) тэргүүлж алтан медаль авчээ.

        Хагас авто стандарт ангилалд өсвөрийн тамирчид дунд Наранбаатарын Ариг түрүүлж алтан медаль хүртсэн байна. Хагас авто стандарт ангилалд өсвөрийн тамирчид дунд Наранбаатарын Амир мөнгөн медаль, хагас авто стандарт ангилалд өсвөрийн тамирчид дунд дэд мастер Алтангэрэлийн Цовоо удаалж хүрэл медаль авчээ. Хагас авто стандарт ангилалд эмэгтэйчүүд дунд багийн дүнгээр Монголын баг (спортын мастер Р.Бямбасүрэн, спортын мастер Н.Одгэрэл, дэд мастер Ш.Оюун-Эрдэнэ, Ү. Халиун нар) хүрэл медаль тус тус хүртжээ.

      Карабин буюу урт бууны төрөл нь Ази тивд төдийлөн өргөн дэлгэрээгүй бөгөөд Европ болон Америк тивийн орнуудын дунд гол өрсөлдөөн өрнөдөг тус тэмцээнд таван тивийн 35 орны 827 тамирчин дөрвөн ангилалд, хүйс болон насны үечлэлээр хуваагдан цэц мэргэнээ сорьсон байна.