Үндэсний аюулгүй байдлын зөвлөлийн ажилтнууд Цагаан сараар хойд хөршийг зорьж, буцахдаа 20 сая ам.доллар бэлнээр авч ирсэн. Мөн УОК-ийн албан бичгийг хуурамчаар үйлдсэн байж болзошгүй гэх мэдээлэл гарсан. Түүнчлэн С.Зоригийн амийг хөнөөсөн хэргийг удаашруулахтай холбоотой материалд ҮАБЗ-ийн ажлын албаны дарга А.Гансүх холбогдож байгаа талаар Ерөнхий сайд Л.Оюун-Эрдэнэ хэлсэн.Үүнтэй холбоотойгоор Үндэсний  аюулгүй байдлын зөвлөлийн ажлын албаны дарга, хуульч А.Гансүх гуравдугаар сарын 9-нд хэвлэлд тайлбар өгсөн юм. Тэгвэл тус өдрийн орой түүний аав автомашинд дайруулжээ. Энэ талаар тэрбээр өөрийн цахим хуудаснаа “У.Хүрэлсүх, Л.Оюун эрдэнэ, Х.Нямбаатар нарт,

Өнөөдрийг хүртэл болж буй үйл явдлыг улс төр, гэхдээ их бохир улс төр гэж бодож явлаа. Хувь хүн рүү дайрсан гүтгэлэг, доромжлолыг тэвчиж ирлээ. ҮАБ-ыг хамгаалдаг хамт олныг гүтгээд эхлэхээр нь нийгэмд хагарал талцал үүсгэхээс сэргийлж 2021 оны гуравдугаар сарын 9-нд “Өдрийн сонин”-д ярилцлага өгсөн. Уншсан биз.

Гэтэл тэр өдрийн орой 17:50 цагт өндөр настай аавыг минь гэрийн гадаах явган хүний гарц гарч явахад нь автомашинаар дайрлаа. Өндөр настай аав маань хүнд гэмтэл авч, одоо гэмтлийн эмнэлэгт эрчимт эмчилгээ хийлгэж байна. Үүнийг би тохиолдолд гэж бодохгүй байна. Миний гэр бүл, ойр дотны хүмүүс рүү халдлага хийж байна. Дараа нь юу болох вэ.

Та нарт хэлэх үг байна. Эр хүний зориг гаргаад зөвхөн надтай л тул. Миний настай аав, ээж, дүү, эхнэр хүүхдүүд, найз нөхөд, хамт олныг орхичих. Тэд маань монгол улсын жирийн иргэд. Монгол төр иргэдээ хэлмэгдүүлэхгүй гэж найдаж байна.

Хууль хүчний байгууллагад итгэхгүй байгаа учир нийгэм рүү хандлаа.

Шуурхай арга хэмжээ авч амийг нь аварсан гэмтлийн эмнэлгийн хамт олонд маш их баярлалаа. Эмч нартаа найдаж байна” гэжээ.