Ардчилсан намын Дотоод сонгуулийн хорооноос мэдээлэл хийлээ. Тус хорооны дарга И.Мөнхжаргал “Ардчилсан намын үндсэн дүрмийн хүрээнд хоёр байгууллага намын их хурлаасаа байгуулагддаг. Үүнээс Дотоод сонгуулийн хороо хуваагдал, тэмцэлд оролгүй өдийг хүрсэн. Гэтэл АН-ын даргаар сонгуулиа хийж, эмх замбараагүй байдлаас гаръя гэж төлөвлөсөн боловч, иргэн С.Эрдэнэ МАН-ын захиалгыг биелүүлж байгаа нь илэрлээ.

С.Эрдэнэ АН-ын даргын сонгуулийн бүртгэл явагдаж байгаа энэ үед намын нарийн бичгээс Дотоод сонгуулийн хорооны тамгыг булаан авч, үүгээр зогсохгүй АН-ын үндсэн дүрмийг зөрчиж, таван хүнийг дотоод сонгуулийн хорооны гишүүн гэж дүрмийн бусаар томиллоо. Улмаар Дотоод сонгуулийн хорооны үйл ажиллагааг зогсоох тогтоолыг нийтэд зарлаж, төөрөгдөлд оруулах гэж байна.

Энэ үйл явдалд би үнэхээр харамсаж байна. Бидэнтэй цуг Дотоод сонгуулийг зарлаж, тамгаа өгнө гэж тохирч, дэмжиж ажиллаж байсан хүн гэнэт тамга булаан авч, Дотоод сонгуулийн байгууллагыг ашиглан үйл ажиллагаа тасалдуулах гэж байгаа нь Ерөнхийлөгчийн сонгуульд АН-ыг оролцуулахгүй байх далд санаархал байна.

Иймд АН-ын гишүүддээ хандаж хэлэхэд энэ төөрөгдөлд авталгүй, сонгуульдаа идэвхтэй оролцож, маргааш үргэлжлэх бүртгэлийн үйл ажиллагаандаа оролцоорой. Хэн нэгэн нь тамга булааж авснаар Дотоод сонгуулийн үйл ажиллагаа зогсохгүй. Тэр хүнд тамга хэрэгтэй бол ав. Бид тамгаа дахин хийлгэж, үйл ажиллагаагаа үргэлжүүлнэ” гэв. Түүнчлэн “Дунд шатны болон ҮБХ-ны сонгуулийн үйл ажиллагааг хойшлуулсан. Зөвхөн АН-ын даргын сонгууль явагдана. Үүнийг гуравдугаар сарын 4, 5-нд бүртгэж, 12-26-нд сурталчилгаа явуулж 28-нд сонгоно. Энэ сонгууль бол АН-ыг цаашид тодорхойлох, Ерөнхийлөгчийн сонгуульд оролцох сүүлийн боломж юм” хэмээн ярилаа.