Ерөнхий сайд Л.Оюун-Эрдэнэ аялал жуучлалын салбарынхантай өглөөний уулзалт зохион байгууллаа. Энэ үеэр тус салбарынхан хил хаасантай холбоотой аялал, жуучлалын салбарт хүндрэл үүсэж байгааг онцлон тавдугаар сараас хил нээх санал тавилаа. Энэ талаар Ерөнхий сайд Л.Оюун-Эрдэнэ "Монгол Улсын нийгэм эдийн засаг амаргүй байна. 2019 онд 5.2 хувийн өсөлттэй байсан эдийн засаг өнөөдөр хасах зургаан хувийн агшалттай байна. 70 мянган ажлын байр байхгүй болсон. Одоо 130 мянган ажлын байр эрсдэлтэй байгаа. Үүнд аялал жуучлалын салбар өртөж байгаа. Ийм амаргүй үед компаниа аварч, улсынхаа эдийн засагт хувь нэмэр оруулж буй та бүхэнд талархал илэрхийлье.

Тавдугаар сарын 1-нээс хил нээх эсэх шийдвэр нь хоёр зүйлээс шалтгаална. Вирусийн халдвар гэдэг гарт баригдаж, нүдэнд үзэгдэхгүй учраас хүндрэл их байна. Бид халдвар хамгааллын дэглэмийг сайтар барьж энэ хугацаанд хүн амын 50-иас дээш хувийг вакцинжуулж чадвал хил нээх боломжтой гэж үзэж байна. Ямартай ч бид асуудлыг судалж Засгийн газрын хуралдаанд танилцуулна” гэлээ.