Цахим наадмыг хойшлуулахтай холбоотойгоор УИХ-ын гишүүн Н.Ганибалаас байр суурь авлаа.  

        Тэрбээр “Монголчууд эрт дээр үеэс есөн хөлт цагаан тугаа цэнгүүлж, улс орныхоо хийморийг сэргээдэг. Угтаа бол олон нийтийг хамруулахгүй, хөл хорионы дэглэмээ баримтлаад цахим наадам хийнэ гэдэг шийдвэрийг Засгийн газар гаргасан. УОК гэдэг нь Засгийн газрын тал гэж хэлж болно. Гэтэл цахим наадмыг хойшлуулах санал оруулж ирж байгаад харамсаж байна. Анхнаасаа баяр наадмыг зохион байгуулах эсэх, хорио цээрийн дэглэмийг хэрхэн баримтлах зэргийг маш тодорхой, иргэдэд ойлгомжтой болгох ёстой. Өөрөөр хэлбэл, бүрэн шийдсэнийхээ дараа наадмын товоо хэлэх хэрэгтэй. Өнөөдөр яагаад бөхчүүд, уяачид, харваачдын хөдөлмөрийг үл тоож, монголын төрт ёсны баярыг үгүй хийж байгааг би гайхаж байна. Ардын хувьсгалын 90 жилийн хойш 100 жилийн өндөр ойд хурдан хүлгээ сойх гэж уяачид арван жил бэлддэг. Бид уяач, малчдын хөдөлмөрийн үнэгүйдлээс илүү яагаад наадам зохион байгуулах ёстой вэ гэдэг цаад мөн чанарыг ойлгох ёстой. Наадам бол тусгаар Монгол Улсын бүрэн эрхт байдлаа илтгэж, олон улсад тунхаглаж буй баяр юм” гэлээ.