IJF буюу Олон улсын сэтгүүлчдийн холбоо Зариг.мн сайтын ерөнхий эрхлэгч, сэтгүүлч Н.Өнөрцэцэгийг суллахыг уриалсан нийтлэлийг хөрвүүлэн хүргэж байна.

Монголын Зариг.мн сайтын ерөнхий эрхлэгч, сэтгүүлч Н.Өнөрцэцэг шүүхийг үл хүндэтгэсэн, худал мэдээлэл тараасан хэргээр арванхоёрдугаар сарын 4-нд баривчлагджээ. Тэгвэл Олон улсын сэтгүүлчдийн холбоо(ОУСХ), Монгол дахь салбар Монголын сэтгүүлчдийн нэгдсэн эвлэл(МСНЭ)-ээс сэтгүүлчийг нэн даруй суллахыг уриалж, хэвлэлийг хааж, дуу хоолойг нь хорих гэсэн оролдлогыг шүүмжилж байна.

Сэтгүүлч Н.Өнөрцэцэгийг баривчлахыг Улаанбаатар хот дахь Зариг.мн сайтын редакцад Монголын хэвлэл мэдээллийнхэн харсан, гэрчилсэн. Түүнийг “Фэйсбүүк” хуудастаа өндөр настны шүүх хурлыг сунжруулж байгаа хүнлэг бус байдлын талаар бичсэнтэй нь холбогдуулан Монгол Улсын Эрүүгийн хуулийн 13.13-т заасан шүүхийг үл хүндэтгэсэн, “худал мэдээлэл тараасан” гэх үндэслэлээр буруутгажээ.

Нийслэл Улаанбаатар хотын Сонгинохайрхан дүүргийн шүүхэд арванхоёрдугаар сарын 1-4-ний өдөр шүүх хурал болж, сэтгүүлч Н.Өнөрцэцэгийг сарын хугацаанд цагдан хорих прокурорын саналыг дэмжсэн. Мөн үүнээс ч өмнө буюу арваннэгдүгээр сарын 29-нд Чингэлтэй дүүргийн Эрүүгийн хэргийн анхан шатны шүүхээс сэтгүүлч Н.Өнөрцэцэгийг Монгол Улсаас гарахыг хязгаарлаж, хилийн хорих тавих саналыг баталсан байна. Түүнчлэн Монгол Улсын хууль, захиргааны байгууллагаас Зариг.мн сайтад нэвтрэх эрхийг хааж, тус сайтыг хууль бус домайны жагсаалтад оруулж, Монголоос хандах эрхийг нь талаар хэвлэл мэдээллийнхэн хамтарсан мэдэгдэлдээ дурджээ. Үүнтэй холбоотойгоор Зариг.мн мэдээллийн сайтын сэтгүүлч, ажилтнууд, сэтгүүлч Н.Өнөрцэцэг арванхоёрдугаар сарын 1-нд Сүхбаатарын талбайд суулт хийсэн. Харин МСНЭ-ээс Монгол Улсын Харилцаа холбооны зохицуулах хороо, Цахим хөгжил, харилцаа холбооны яам, Цагдаагийн ерөнхий газар, Монгол Улсын Ерөнхий прокурорын газарт шаардлага хүргүүлсний дараа арванхоёрдугаар сарын 4-нд Зариг.мн сайтад хандах эрхийг нээсэн байна.

                          Сэтгүүлч Н.Өнөрцэцэгийг хийсэн ажлынх нь төлөө 2019 онд 12 удаа, 2020 онд дөрвөн удаа нэр төрд халдсан хэргээр буруутгаж байгаа бөгөөд гомдол, мэдээллийг улстөрчид мэдүүлжээ. Хэдий дээр дурдсан олонх хэрэгт сэтгүүлч Н.Өнөрцэцэг ялалт байгуулсан ч 800 орчим ам.долларын торгууль ногдуулсан байгаа нь Монголын дундаж сэтгүүлчдийн хоёр сарын цалинтай тэнцэх хэмжээний мөнгөн торгууль болж байна.

Арванхоёрдугаар сарын 8-нд болсон шүүх хуралд сэтгүүлч Н.Өнөрцэцэгийн өмгөөлөгчид оролцож, сэтгүүлчийг үндэслэлгүй цагдан хорьсон тул суллах хүсэлт шүүхэд гаргасан. Мөн мөрдөн байцаалтын явцад хуулийн зарим зүйл заалт зөрчигдсөн байж болзошгүй, мөрдөн байцаалтын ажиллагааг санаатайгаар хурдасгасан гэж үзэж байгаа илэрхийлсэн байна.

Монголын хууль сахиулах байгууллага, эрх баригчид Эрүүгийн хуулийн 13.14 дэх заалтыг ашиглан сэтгүүлчдийн мэргэжлийн үүргээ биелүүлэх чадварыг хязгаарлах зорилгоор мөрдөн шалгах ажиллагаа явуулж байна гэж Монголын хэвлэл мэдээлэл мэдээлж байна. Хуурамч мэдээлэл тараах, тараасан тохиолдол торгууль ногдуулах, албадан хөдөлмөр хийлгэх тухай хууль тус улсад 2020 оны нэгдүгээр сарын 10-наас хэрэгжиж эхэлсэн. Түүнээс хойш олон сэтгүүлч гэмт хэрэгт буруутгагдсан байна. Одоогоор Зариг.мн сайтын ерөнхий эрхлэгч, сэтгүүлч Н.Өнөрцэцэг, Asu.mn сайтын сэтгүүлч У.Уранчимэг, Tas.mn сайтын сэтгүүлч А.Баярмаа нарын 10 орчим монгол сэтгүүлчийг мөрдөн байцааж байна. Тэр дунд Монгол Улсад мөрдөгдөж буй гадаадын хөрөнгө оруулалтын тухай хууль болон түүнийг шинэчилж болох найруулгын талаар судалж, мэдээлж байгаа сэтгүүлч Ж.Баттуул багтсан байна.

                                Энэ асуудлаар МСНЭ-ээс “Монголоос Зариг.мн сайт руу хандах эрхийг хааж байгаа нь мэргэжлийн сэтгүүл зүй, хэвлэлийн эрх чөлөөний зарчим, хэм хэмжээг илт зөрчсөн явдал. Зөвхөн тус компанийг удирдаж байгаа хүнийг шалгаж байхдаа редакцын үйл ажиллагааг зогсоож, битүүмжилсэн нь хэвлэлийн эрх чөлөө, иргэний мэдэх эрхэд халдсан хэрэг” хэмээн мэдэгдэл гаргасан. Тэгвэл Олон улсын сэтгүүлчдийн холбооноос “Монголын эрх баригчдаас Н.Өнөрцэцэг нарын сэтгүүлчийг нэн даруй суллаж, Монгол дахь сэтгүүлчдийн мэргэжлийн ажилд хөндлөнгөөс оролцохгүйгээр ажлаа гүйцэтгэх боломж олгож, хэвлэлийн эрх чөлөө, үг хэлэх эрх чөлөөг хангахыг уриалж байна”.