Эргэлт.мн мэдээллийн сайт энэ долоо хоногт төрийн байгууллагуудын хайхрамжгүй үйлдлээс болж амиа алдсан 10 настай охины  харамсалтай хэргийн талаар онцолж байна.

 

Коронавирусийн халдвар дотоодод илэрч, хөл хорио тогтоосноос хойш нэг том хүн, нэг хүүхэд амиа алдлаа. Гэвч тэд дэлхий нийтийг цочроосон цар тахлын халдвараар бус төрийн байгууллагын уялдаа холбоогүй ажил, бусдын хайхрамжгүй үйлдлээс болж хорвоог орхисон. Тодруулбал, Сэлэнгэ аймгийн Баянгол сумын II багийн иргэн Б.Пүрэвбаатарын охин 10 настай Н нь тархины цус харвалттай гэх оноштойгоор арваннэгдүгээр сарын 23-нд ЭХЭМҮТ-д хүргэгдэн иржээ. Гэвч эмнэлэгт ирээд хоёр хоногийн дараа охин нас барсан байна. 

 

Талийгаач охины ээж Х.Урантогостой холбогдож уг асуудлыг тодруулахад “Миний охин гэнэт л толгой нь хүчтэй өвдөж, бөөлжөөд сумынхаа эмнэлэгт үзүүлсэн. Тухайн үед эмч нар хордлого гэсэн онош тавьж, рингер, анальгин димедрол тарьсан. Хоёр хоног өвчин нь намдсан чинь гурав дахь хоногийнхоо өглөө гэнэт л орилж босож ирээд толгойгоо савчаад байсан. Дахиад эмнэлэгт хандахад “Мандал сумын эмнэлэгт яаралтай очиж үзүүл” гэсэн. Мандал сумын эмнэлэгт миний охин очихдоо алхаж чадахгүй болж, “Тархины цус харвалт байж магадгүй” гэсэн онош тавьж, нугасны ус аваад Улаанбаатар хот руу явуулахаар болсон. 22-ын товчоонд очиход “Голомттой бүсээс ирсэн” гээд эмнэлэг хүлээж авахгүй гээд биднийг гурван цаг орчим хот руу оруулаагүй. Хүүхдийн маань аппаратны хүчилтөрөгч дуусах гээд байсан учир бид арга ядаад Зүүнхараа руу эргээд буцахаар болсон. Гурван цаг охин минь хүйтэн машинд толгой нь хүчтэй өвдөж, тарчилсан. Гэтэл 

 

 

Тэгээд эмнэлгийн дарга, түргэний эмч гээд ЭХЭМҮТ рүү олон хүн хэл дуулгаж байж арай гэж охиныг минь нийслэл рүү оруулахаар болсон. ЭХЭМҮТ-ийн эмч залгаад “Охиныг чинь эмнэлэгт авч болно гэнэ. Харин таныг 21 хоног тусгаарлана. Үүнийг зөвшөөрч байвал ирж болно” гэхээр нь хүүхдээ аврахын тулд зөвшөөрсөн. Тэгээд бид түргэний тэрэгтэй хот руу нэвтэрч, намайг 25 дугаар эмийн сангийн ойролцоо буулгаад, “... зочид буудалд тусгаарлагд” гээд ганцааранг минь явуулсан. Өнөөх газарт нь яваад очтол “Манайд гурван хятад хүн байгаа учир авахгүй” гэхээр нь эмнэлгийн гадаа алхаад очсон. Охиныг минь Эх нялхсын жижиг өрөөнд ганцааранг нь тусгаарласан байна лээ. Шинжилгээ аваад 24 цаг болсны дараа тасагт шилжүүлж, шинжилгээ авсан гэсэн.

 

Энэ хооронд би эмч нар руу олон удаа залгаж асуухад “Ажилтай байна. Битгий олон дахин залгаад бай. Танай хүүхэд сэхээнд орохооргүй зүгээр байна” гэсэн. Ингэж хэлэхээр нь жаахан уужраад байж байтал маргааш нь эмнэлгээс залгаад “Яаралтай ир” гэхээр нь яваад очиход миний охин ямар ч ухаангүй болчихсон байсан. Арван минут биднийг охинтой минь уулзуулаад “Эмчилгээ хийж байгаа” гэж хэлсэн. Төд удалгүй дахин дуудаад “Хүүхдийн чинь биеийн байдал тун муу байна. Таныг сахиураар авна” гэж хэлээд оруулсан. Сахиураар орж байгаа юм байх гэж бодсон чинь охиноос минь тусдаа олон хүнтэй хамт эмнэлгийн хонгилд тусгаарласан. Гэтэл тэнд хэвтэж байсан хүмүүс намайг “Коронавирус гарсан нутгаас ирсэн хүн холд, яв” гэх мэтээр хэлж хөөсөн. Миний охиныг хүртэл голомттой бүсээс ирсэн гээд ганцааранг нь нэг өрөөнд байлгасан байна лээ. Эмнэлэгт ирээд хоёр хоноод л нас барсан. Үнэхээр гомдолтой байна” гэсэн юм.

 

 

Дэлгэрэнгүйг доорх холбоосоор уншина уу.

 

https://ergelt.mn/news/59/single/3489