Коронавирусийн халдвар авсан, халдварын улмаас хайртай хүнээ алдсан хүмүүстэй ярилцсанаа хүргэе. Манай улсад өдөрт дунджаар таван хүн халдварын улмаас амиа алдаж, 1000-2000 хүн халдвар авч байна.

Вакцины нэг, хоёрдугаар тунгаа аваад халдвар авсан гэр бүл:

Гэр бүлийн дөрвөн хүн өвдөж, нэг нь хүндэрч, эмнэлэгт хүргэгдсэн бол гурваас нь шинж тэмдэг илрээгүй

            Баянзүрх дүүргийн 19 дүгээр хорооны иргэн М гэр бүлийн хамт халдвар авчээ. Түүний ээжид шинж тэмдэг илэрсэн тул шинжилгээ өгсөн байна. Хариу нь эерэг гарч, гэр бүлээрээ өвдсөн нь батлагджээ. 60 орчим настай ээжийнх нь бие хүндэрч, эмнэлэгт хэвтэж, 14 хоног эмчлүүлжээ. Энэ талаар түнээс тодрууллаа.

-Гурван хүнд нь шинж тэмдэг илрээгүй гэсэн үү. Тухайн үед ээжийнх нь биеийн байдал ямар байсан бэ?

            -Тиймээ, манай ээжийн бие хүндэрч, эмнэлэгт хүргэгдсэн. Ээж маань вакцины хоёр дахь тунгаа хийлгээд 14 хоног болчихсон байсан. Хөдөө явах гээд шинжилгээ өгтөл халдвартай болох нь батлагдсан. Цээж нь үе үе хатгуулж, хоолой өвдөж байсан юм билээ. Тэгээд эмнэлэгт хэвтээд, эхний гурав хоногтоо хүндэрсэн гэсэн. Толгой нь маш их өвдөж, бөөлжиж, гүйлгэх шинж тэмдэг хүчтэй илэрсэн гэсэн. Сүүлдээ бүүр хүчилтөрөгчийн аппарат хүртэл залгуулсан байх. Хэд хоног эмчилгээ хийлгэж байгаад эдгээд гарсан. Одоо бие нь бага зэрэг сульдсан, ядарсан байдалтай байна. Мөн халдвар илрээд гурав хоноод ээжийн амтлах, үнэрлэх мэдрэмж алга болсон. Даралт нь байнга ихэссэн, амьсгаа ихтэй гээд бие нь хүнд байсан.

            Харин эхнэр, дөрвөн настай охин маань болон надад шинж тэмдэг илрээгүй. Шинжилгээ өгөөд эерэг гэж гарсан учраас гэртээ тусгаарлагдсан. Эхний өдөр өрхийн эмнэлгээс залгаж, лавлаж асуусан. Түүнээс хойш ганц ч удаа хэн ч залгаагүй. Бид шинж тэмдэг илрээгүй учраас өөрсдөө ч холбогдоогүй.

-Та хоёр вакцин хийлгэсэн байсан уу?

-Эхнэр маань хоёр дах тунгаа хийлгээд хэдийн 14 хоночихсон байсан. Ээжтэй нэг өдөр хамт хийлгэсэн байх. Харин би эхний тундаа хамрагдаад 20 гаруй хонож байсан. Хоёр дах тунгаа хийлгэх гэж байтал халдвар илэрсэн.

-Гэртээ эмчилгээ хийсэн үү?

-Хөнгөн хүмүүсээ бол шууд “хаяж” байгаа юм билээ. Халдвартай байхад хэн ч залгахгүй, яриагүй болохоор тэгж бодсон. Эхнэр маань 5000-тай д витамин, 1000 с витамин нөөцөлсөн байсан юм билээ. Тэрийг нь долоо хоног уусан. Охин маань мөн адил витамин уусан. Өөр эмчилгээ гэж тодорхой хэлэх юм алга. Хүн болгоны биеийн онцлог өөр юм байна гэдгийг л мэдэрсэн. Хавсарсан суурь өвчтэй хүмүүс бол хурдан хугацаанд эмчилгээ хийлгэхгүй бол амархан хүндэрдэг юм байна лээ.

-Эдгэсэн гэдгээ яаж мэдсэн юм бэ?

-Бид 14 хоног болоод ХӨСҮТ-ийн 119 гэдэг утас руу залгаж зөвлөгөө авсан. 14-21 хоногийн дараа эдгэсэн гэдэг бичгээ авч болно гэж хэлсэн. Тэгээд эдгэсэн гэдэг бичгээ авсан.

         Вакцин хийлгээгүй халдвар авсан иргэн:

“Жирэмсэн хүнд витамин д, с өгч байна”

Баянзүрх дүүргийн наймдугаар хорооны иргэн А коронавирусийн халдвар авчээ. Тэрбээр таван сартай жирэмсэн бөгөөд ЭХЭМҮТ-д хэвтэн эмчлүүлж байгаад гэртээ гарч, долоо хоногийн дараа халдвартай гэдэг нь батлагдсан байна.

-ЭХЭМҮТ-д хэвтэж байхдаа та ойрын хавьтал болсон юм уу?

-Намайг хэвтэж байхад өөр тасгийн хүнээс халдвар илэрсэн гээд тусгаарлаж байсан. Тухайн үед биднээс шинжилгээ аваагүй. Сувилагчаас нь “Халдвар илэрсэн хүнийг тусгаарласан уу” гэж асуусан. Гэтэл “Халдвар илэрсэн юм уу, мэдээгүй” гэж хэлсэн. Тэр сувилагч өдрийн ээлжинд гарахдаа халдвар илэрсэн тасагт ч гэсэн үйлчилгээ үзүүлж байсан. Уг нь өөрсдөө ээлжинд гарах бүртээ шинжилгээ өгдөг юм шиг байна лээ. Хаанаас халдвар авснаа мэдэхгүй. Гэртээ ирээд долоо хоноод л хамрын ханиад хүрсэн. Өрхөөс ирж шинжилгээ аваад эерэг гарч, эмнэлэгт ирсэн.

-Таны биеийн байдал ямар байна вэ?

-Бага зэрэг ханиаж, хоолой өвдөж байна. Хөнгөн хамрын ханиад яаж хүрдэг вэ яг тийм л шинж тэмдэг илэрч байгаа. Уг нь гэрээр эмчилгээ хийлгэж болох юм билээ. Жирэмсэн учраас эмнэлэгт ирсэн. Жирэмсэн болохоор эмчилгээ гэж витамин д, с л уулгаж байна. Өөрийнхөө дархлаагаар л эдгэх бололтой. 10 хоног эмчилгээ хийлгээд гаргана гэсэн. Хэрэв хүндэрвэл өөр эмнэлэг рүү шилжүүлэх юм байна лээ.

-Жирэмсэн учраас вакцинд хамрагдаагүй юу?

-Тиймээ, хамрагдаагүй. Харин хоёр тундаа хамрагдсан нөхрөөс минь одоогоор халдвар илрээгүй байна. Би халдвар авсан нь батлагдаж, эмнэлэгт ирээд гурав хонож байна.

-Эмнэлэгт хэвтэж байгаа хүмүүсийн биеийн байдал ямар байна вэ?

-Манай энд ихэвчлэн хөнгөн хүн байгаа бололтой. Өрөөндөө хоёр хүн л байдаг. Хүнд, амьсгал нь давчидсан, дутагдалд орсон  хүмүүсийг эмнэлэг рүү зөөвөрлөж байх шиг байна. Цонхоор ороход эхчүүдийг зөөвөрлөөд байсан. Энд дандаа жирэмсэн хүмүүс хэвтэж байгаа.

        Вакцины хоёр тун хийлгээд нас барсан хүний ар гэр:

Вакцины хоёрдугаар тунгаа хийлгээд хоёр хоногийн дараа халуурч, эмнэлэгт нас барсан

57 настай эрэгтэй халдвар авч нас баржээ. Талийгаач хоёрдугаар тундаа хамрагдсан байсан гэнэ. Түүний ар гэрийнхэн вакцинаас болж нас барсан гэж үзэж байгаа аж. Энэ талаар талийгаачийн төрсөн эгч Э-тэй ярилцлаа.

-Таны дүү архаг суурь өвчтэй байсан уу?

-Би найман дүүтэй. Ижий, аав минь бидний бага залуу байхад нас барсан учраас би дүү нараа гардаж өсгөсөн хүн. Талийгаач дүү минь 57 настай бөгөөд суурь өвчин байгаагүй. Сүүлийн хэдэн сар даралт нь бага зэрэг хэлбэлзээд байсан гэсэн. Бусдаар бие нь өвдөж байгаагүй.

-Вакцинаа хэзээ хийлгэсэн байсан юм бэ?

-Хугацааг нь сайн мэдэхгүй байна. Хоёрдугаар тунгаа тавдугаар сарын 26-нд хийлгэсэн байх. Вакцинаа хийлгээд дотор нь муухайрч, хоёр хоног гэртээ халуурсан юм билээ. Дүү маань нийгмийн идэвхтэй, геологийн мэргэжилтэй учраас орон нутагт ажилладаг байсан. Ажил руугаа явах гээд вакцинаа яаран хийлгэсэн байх. Эхнэртэйгээ хамт очиж, БНХАУ-ын вакцин хийлгэсэн гэсэн. Эхнэрт нь хариу урвал илрээгүй. Эрүүл мэндийн ажилтнууд сайн ажиллаж байгаа байх. Гэхдээ зарим хайхрамжгүй, сэтгэлгүй хүмүүсээс болж эд хийж бүтээж явсан миний дүү амиа алдчихлаа. Бие нь өвдөхгүй болохоор өөрийгөө эрүүл гэж бодож байсан дүүгийн минь ядаж даралтыг үзээд өгөхөд яасан  юм бол. Тэд жаахан л сэтгэл гаргачихсан бол миний дүүд вакцин хийхгүй, дүү минь амьд байж байх байсан шүү дээ.

-Эмнэлэгт очоод хэд хоноод нас барсан юм бэ?

-Гэртээ гурав хоноод, эмнэлэгт хүргэгдсэн юм шиг байна лээ. Эмнэлэгт хүчилтөрөгчийн аппараттай хэд хоног байж байгаад хүндэрч, эрчимт эмчилгээ буюу сэхээн амьдрах тасаг руу шилжсэн. Сэхээний тасагт хоёр, гурав хоноод л нас барсан байх. Би хөдөө орон нутагт байдаг болохоор дүүтэйгээ уулзаж чадаагүй. Нас бардаг өдрийнх нь өглөө гуурс тавина гэж байсан ч тавиагүй. Эмч нар нь “Энэ хүний бие дийлэхгүй юм байна” гэж хэлсэн байна лээ. Гэрийнхэн маань дүүтэйгээ, нөхөртэйгөө, аавтайгаа уулзаж чадаагүй.

-Халдвар авсан нь батлагдсан юм уу?

-Эмнэлэгт очоод өгсөн эхний шинжилгээгээр халдвар илрээгүй гэсэн. Бие нь муудахаар нь дахиад авсан юм шиг байна лээ. Тэр шинжилгээгээр нь халдвар илэрсэн гэсэн. Халдвар илэрсэн учраас цогцсыг нь ар гэрийнхэнд өгөөгүй байх.

-Та буяны үйл ажиллагаанд нь оролцож чадсан уу?

-Үгүй. Оршуулгын ёслолд долоон хүний оролцуулна гэж хэлсэн юм билээ. Тэгээд манай дүү нар “Та ирээд ч харж чадахгүй. Оршуулах үйл ажиллагаанд оролцож чадахгүй юм чинь хэрэггүй” гээд очиж чадаагүй. Дүүгийнхээ шарилд ч хүрч чадаагүй, цагаан сүү ч дусааж чадсангүй. Манай дүү нарт холын зайнаас цагаан даавуугаар боосон цогцсыг нь харуулсан байна лээ. Тэгээд л оршуулсан гэсэн.