Элсэлтийн Ерөнхий Шалгалт дөхсөн энэ өдрүүдэд сурагчид догдлол, сандрал дүүрэн байгаа байх. Шалгалтын дараа тулгардаг нэг асуудал нь ямар мэргэжил, сургууль сонгох. Сургалтын төлбөрийн мэдээлэл байдаг. Тэгвэл бид энэ удаад Монгол Улсад үйл ажиллагаа явуулдаг их сургуулиудын төлбөр, тэтгэлэгийн мэдээллийг нэгтгэн хүргэж байна.

               Их, дээд сургуулийн нэгдүгээр курсийн оюутнууд элсэхдээ бүтэн жилийн төлбөрөө төлсөн тохиолдолд хичээл сонголтоо хийдэг. Харин  хоёрдугаар курсээс эхлэн төлбөрөө улирал эхлэхэд төлж, хичээл сонголтоо хийнэ. 

МОНГОЛ УЛСЫН ИХ СУРГУУЛИЙН ТӨЛБӨР 4.5-5 САЯ ТӨГРӨГ БАЙНА

      МУИС 1942 онд байгуулагдсан Монголын ууган их сургууль юм. Одоогоор бүрэлдэхүүний 8 сургууль, орон нутаг дахь харьяаллын гурван сургуультай. Мөн гурван ахлах сургууль, экологийн боловсролын төв, сургалт, судалгааны хүрээлэн, төвүүдтэй. Монгол Улсын их сургуульд шинэ элсэгчдийн ерөнхий суурь хичээлийн нэг кредитийн үнэ 154000 төгрөгөөр тогтоогдсон бол мэргэжлийн суурь хичээл нь  154700-178500 төгрөг. Нэг жилийн төлбөр 4.5-5 сая төгрөг байна.

МУБИС-ИЙН ТӨЛБӨР ГУРВАН САЯ 700 МЯНГА

      Монгол Улсын Боловсролын Их Сургууль (МУБИС) нь 1951 онд Багшийн институт нэртэйгээр эрдмийн үүдээ нээж, өрхөө татсанаас хойш 70 шахам жил ололт, амжилт, хөгжил дэвшлийн зам туулж байгаа баялаг түүхтэй төрийн өмчит тэргүүлэх их сургуулиудын нэг юм. Тус сургууль 1957 оноос Улсын Багшийн Дээд Сургууль, 1991 оноос Улсын Багшийн Их Сургууль, 2003 оноос Монгол улсын Боловсролын Их Сургууль болж зорилго чиглэл үйл ажиллагаа нь өргөжсөн. Өнөөдрийн байдлаар бакалаврын түвшинд 43 мэргэжлээр 11000 оюутан, магистр, докторын түвшинд 9000 орчим суралцагчид, 1500 гаруй гадаад оюутан, 900 орчим багш профессор, ажилтан ажилчидтай үйл ажиллагаа явуулж байна. МУБИС бүрэлдэхүүний 7, орон нутагт салбар хоёр сургууль болон ерөнхий боловсролын сургуулийн үйл ажиллагааг явуулж буй

     МУБИС-ийн нэг жилийн сургалтын төлбөр дунджаар  2023 оны хичээлийн жилд хоёр сая 808 мянга болж, 508 мянган төгрөг. Харин 2024 гурван сая 561 мянган төгрөг болж нэмэгдсэн. Харин энэ жил гурван сая 700 мянга болжээ.  Сонгосон мэргэжил, хичээлээс хамаарч энэ үнэ нэмэгддэг. Мөн ЭЕШ-ийн онооноос хамаарч 50-100 хувийн тэтгэлэг авах боломжтой.

ШИНЖЛЭХ УХААН ТЕХНОЛОГИЙН ИХ СУРГУУЛЬ

           ШУТИС судалгааны их сургууль болохын тулд их сургуулийн бүтцийг дэлхийн жишигт ойртуулж, сургалтын чанарыг эрс дээшлүүлж, дэлхийн түвшинд хүрсэн профессор багшийн тоог нэмэгдүүлэх, судалгаа шинжилгээний ажлын цар хүрээ, үр өгөөжийг нэмэгдүүлж, инновацийг нэвтрүүлж, Азийн тэргүүлэх 200 их сургуулийн тоонд орох зорилт тавин ажилладаг.

         Тэгвэл тус сургуулийн сургалтын төлбөр хөтөлбөрөөсөө хамааран нэг кредитийн үнэ харилцан адилгүй. шинээр элсэгчдийн нэг кредитийн үнэ 190000 төгрөг, нэг жилийн нийт төлбөрийг дунджаар 4.2-4.8 сая төгрөг байна.

АНАГААХЫН ШИНЖЛЭХ УХААНЫ ИХ СУРГУУЛЬ

         1961 онд МУИС-ийн Хүн эмнэлгийн факультетийн суурин дээр үндэслэн бие даасан Анагаах ухааны дээд сургууль болсон. Анагаах болон Уламжлалт анагаахын таван жил, бусад салбар сургуулиуд дөрвөөс таван жилийн сургалтын хөтөлбөртэй. 2014 онд бүрэлдэхүүндээ 41 тэнхим, Сургалтын бодлого зохицуулалтын, Санхүү, эдийн засаг, Гадаад харилцаа хамтын ажиллагааны, Хангамж үйлчилгээний газрууд, Захиргаа, хяналт шинжилгээ, үнэлгээ, Мэдээлэл технологийн, Мэргэжил дээшлүүлэх институт, Оюутны, Эрдмийн сургалтын  албадууд, Их сургуулийн нэгдсэн эмнэлэг, Шинжлэх ухаан технологийн төв, Цөм лаборатори, Анагаах ухааны төв  номын сан, “Эрхэс” хэвлэх үйлдвэр, Оюутны I, II, III байр, “Эрхэс” сувилал, “Баян чандмань” сувилал, НАСС-ийн эмнэлэг зэрэг нэгжтэй ажиллаж байна.

           Бакалаврын нэг кредитийн төлбөр  мэргэжлээсээ хамаарч 118000-170000 төгрөг байна. Харин жилийн төлбөр мэргэжил, салбар сургуулиасаа хамаарч харилцан адилгүй дунджаар таван сая 300 мянган төгрөг байгаа аж.

ХӨДӨӨ АЖ  АХУЙН ИХ СУРГУУЛЬ

  ХААИС нь 1958 онд Мал эмнэлгийн ангийг нээж түүхэн замналынхаа анхны хуудсыг эхлүүлсэн. Одоо бүрэлдэхүүн таван сургууль, орон нутгийн салбар нэг сургууль, харьяа эрдэм шинжилгээний дөрвөн хүрээлэнтэй, эрдэм шинжилгээ-сургалт үйлдвэрлэлийн гурвалсан холбоо бүхий үндэсний хэмжээний, төрийн өмчийн, ууган их сургуулиудын нэг болон өргөжжээ.

      Нэг кредитийн төлбөр ерөнхий суурь болон мэргэжлийн, мэргэших хичээлийн аль нь болохоос хамаарч 135-154 мянган төгрөг. Харин жилийн төлбөр дөрвөн сая 600 мянга байна.

СОЁЛ УРЛАГИЙН ИХ СУРГУУЛЬ

   Соёл урлагийн их сургууль нь бүрэлдэхүүн зургаан сургууль (Дүрслэх, дизайн урлагийн сургууль, Театрын урлагийн сургууль, Радио, телевиз, медиа урлагийн сургууль, Соёлын сургууль, Хөгжмийн урлагийн сургууль, Бүжгийн урлагийн сургууль), Бадмаараг ахлах сургууль, Соёл урлаг судлалын хүрээлэн , Завхан дахь Хөгжим бүжгийн коллежтой, бакалаврын 26, магистрын 34, докторын хоёр хөтөлбөрөөр мэргэжлийн боловсон хүчнийг бэлтгэж байна.

      Соёл, урлагийн их сургуульд суралцагчдын нэг кредитийн үнэ 155000 төгрөг.  Нэг жилийн нийт төлбөр 3.5-4 сая төгрөгийн хооронд хэлбэлзэж байна.

ХУВИЙН ИХ СУРГУУЛИЙН ТӨЛБӨРИЙГ НЭГТГЭН ХҮРГЭВЭЛ,

• Санхүү, эдийн засгийн их сургуулийн нэг кредитийн үнэ 282000 төгрөг. 5-11 сая төгрөгийн төлбөртэй байна.
• Их Засаг Олон Улсын Их Сургууль хууль, бизнес, анагаах, инженер гээд маш олон салбарт сургалт явуулдаг томоохон цогцолбор сургууль. Жилийн төлбөр 4-6 сая төгрөг байна.
• Мандах Их Сургууль нягтлан бодох бүртгэл, санхүүгийн чиглэлээр төрөлжсөн, чансаа өндөр сургууль. Жилийн төлбөр  4-5.5 сая төгрөг байна.
• Глобал Удирдагч Их Сургууль гадаад харилцаа сайтай, 2+2 хөтөлбөрөөр АНУ, Солонгос руу оюутан шилжүүлэн сургах тал дээр идэвхтэй.   Жилийн төлбөр  4-6 сая төгрөг байна.
• Хүмүүнлэгийн Ухааны Их Сургууль гадаад хэл, олон улсын харилцаа, бизнесийн удирдлагын чиглэлээр улсдаа тэргүүлэгчдийн нэг. Жилийн төлбөр 4.6-7 сая төгрөг байна.
• Этүгэн Их Сургууль анагаах ухаан, сувилахуй болон бизнесийн чиглэлээр сүүлийн жилүүдэд эрчимтэй өргөжиж буй сургууль. Жилийн төлбөр 4.2-6.5 сая төгрөг байна.
• Эм Ай Ю (MIU) олон улсын дээд сургууль одоогийн байдлаар “Эм Ай Ю” дээд сургууль нь бакалаврын 8, магистрын 4 хөтөлбөртэйгөөр нийт 420 гаруй оюутан, 60 орчим багшийн бүрэлдэхүүнтэй сургалтын үйл ажиллагаагаа амжилттай явуулж байна. Сургуулийн нийт багш нарын 40 орчим хувь, оюутнуудын 35 орчим хувийг гадаад улсын иргэд бүрдүүлдэг. “Эм Ай Ю” дээд сургууль нь бүх хичээл 100 хувь англи хэл дээр явагддаг нь тус сургуулийн онцлог давуу тал юм. Сургалтын төлбөр 8-20 сая төгрөгийн хооронд хэлбэлздэг.