Жагсагчдын “захиалга”-аар Засгийн газраа огцруулж, том төслүүдээ боймолдог МАН-ынхан ухсан нүхэндээ өөрсдөө уналаа. Үйл явдлыг эргэж харвал хөхөө өвлийн хүйтнээр хүүхдээ тэвэрсэн ээжийг  углааш, халаадтай гаргасан гэх жагсагчдын шаардлагаар У.Хүрэлсүхийн Засгийн газар хариуцлага хүлээж, танхимаараа огцорч байлаа.

       Араас нь Л.Оюун-Эрдэнийн Засгийн газар “Орлогоо нотлох”-ыг шаардсан жагсагчдын “захиалга”-аар огцорсон. Хамгийн сүүлд Халзан бүрэгтэйн ордын хайгуул судалгааны ажлыг орон нутгийн иргэдтэй ойлголцоогүй гэх шалтгаанаар түр хугацаанд зогсоох шийдвэр гаргаснаа Засгийн газар танилцуулсан. Нүүрсний хулгай, Хөгжлийн банкны хэрэгтнүүдийг жагсагчдын шаардлагаар зарласан.

     Харин өнөөдөр Оюутолгойн хөрөнгө оруулалтыг эсэргүүцсэн жагсагчид Оюутолгойн зэсийн баяжмалын замыг хааж, эдийн засгаа эрсдэлд оруулах  хүртлээ галзуурч байна. Шулуухан хэлэхэд сошиал тролл, жагсагчдын дуулианаар Засгийн газрын ажлаа явуулж ирсэн гороо МАН-ынхан өөрсдөө амсаж байна.  Үнэндээ өнгөрсөн хугацаанд томоохон  төсөл хөтөлбөр, гаднын хөрөнгө оруулалтыг жагсагчдын “захиалгаар” гацааж, хойшлуулдаг, зармыг нь зогсоох хүртлээ төрийн бодлого, эдийн засгийн эрхээ жагсагчдаар удирдуулсаны тод илрэл юм.

      Жагсагчид, троллууд олон хандалт авах тусам улстөрчид өөрийг нь олон нийт муухайгаар харж эхэлнэ гэж айдаг учраас л троллууд төрийн толгойд гарчихаад байгаа нь энэ. Гэтэл өнөөдөр Оюутолгойн зэсийн баяжмалын замыг хааснаар Монгол Улс таван тэрбум төгрөгийн орлого тасрах эдийн засгийн эрсдэлтэй нүүр тулаад байна. Энэ талаар Аж үйлдвэр, эрдэс баялгагийн сайд Г.Дамдинням “Хэсэг бүлэг иргэд "Оюутолгой" ХК-ийн зэсийн баяжмалын экспортын замыг  хааснаар өдөрт таван тэрбум төгрөгийн орлогоо манай улс алдана. Хэрвээ энэ хэмжээний орлого алдвал тухайн хүмүүсээс нэхэмжилнэ. “Оюу толгой” компаний татвар, хураамж Монгол Улсын нэгдсэн төсвийн татварын орлогын ойролцоогоор есөн хувийг бүрдүүлдэг” хэмээн мэдэгдсэн.

         Улмаар Оюутолгой ХК-иас ““Эрс Шинэчлэл Хөдөлгөөн”-ий нэр бүхий иргэд Оюу толгойн үйл ажиллагаанд саад учруулах зорилгоор баяжмал тээвэрлэлтийн замыг хаагаад байна. Үүний улмаас хуваарьт баяжмал тээвэрлэлт зогсож, экспорт тасалдах, гэрээгээр хүлээсэн үүргээ биелүүлж чадахгүйд хүрэх эрсдэл үүслээ. Экспорт саатсан нэг долоо хоног тутамд улсын төсөвт ойролцоогоор 35 тэрбум төгрөгийн татварын орлого, тэр дундаа 21 тэрбум төгрөгийн АМНАТ тасалдах эрсдэлтэй байна. “Оюу толгой” компани нь Монгол Улсын төсвийн татварын орлогын ес орчим хувийг бүрдүүлж, өдөр бүр 23 тэрбум төгрөгийн хөрөнгө оруулалтыг эдийн засгийн эргэлтэд оруулж, олон айл өрх, үндэсний бизнес эрхлэгчдийг дэмжсээр ирсэн. “Оюу толгой” компани иргэдийн эвлэлдэн нэгдэх, үзэл бодлоо илэрхийлэх эрхийг хүндэтгэж, шаардлага тавьсан иргэд, төрийн бус байгууллагуудтай уулзан, тухай бүр хариу өгч, ажил хэрэгч харилцахыг чухалчилж ирсэн.

      Гэвч одоогийн нөхцөл байдал нь улсын төсөвт их хэмжээний тасалдал үүсгэж, гадаад орчинд Монгол Улс, Монголын уул уурхайн салбарын нэр хүндийг унагаах уршигтай. Иймд Монгол Улсын нийтлэг эрх ашгийг эрхэмлэн, уурхайн үйл ажиллагааг хэвийн, тасралтгүй явуулахад саад учруулахгүй байхыг уриалж байна” хэмээн мэдэгдээд байна.

     Ёстой эдээрээ оролдвол эвдэхийн шинж гэгч болоод байна, Оюутолгойн асуудал. Шаардлага тавьж, хариуцлага нэхэх нь зүйтэй ч, шууд замыг нь хааж, экспортын бүтээгдэхүүнээ гаргахгүй байх нь эдийн засгаа шууд боймолж байгаа хэрэг мөнөөс мөн. Ганц өдөр ч зогсох эрхгүй ажиллаж байгаа Оюутолгойн ордод гэрээгээ хүлээсэн үүрэг гэж бий. Гэтэл зэсийн баяжмалын замыг гэнэт хааж зогслоо гээд  бүгд шийдэгдчихгүй. Харин ч манайх эдийн засгийн алдагдалд орж, гаднын хөрөнгө оруулагчдын аманд багтах зам руугаа өөрсдөө сайн дураараа орж байгаагаас ялгаагүй болно. Тэгэхээр жагсагчдын эрх ашгийг Монгол Улсын төлөө байна гэж харах ч нэг талаараа өрөөсгөл асуудал болж байна.

      Эцэст нь, дахин сануулахад эрх баригчид жагсагчдаар толгойгоо мэдүүлж, Засгийн газраа огцруулдаг, сошиал хандалтаар ажлаа явуулдаг поп улс төрийн шийдвэр гаргаж ирснийхээ горыг өнөөдөр Оюутолгойн жагсаал дээр өөрсдөө амслаа. Жагсаалаа олны анхааралд хүргэхийн тулд тролл армиуд юу ч хийхээс буцахгүй болсныг ч харлаа, монголчууд.