Монгол хүний эрдэнэт амь, эрүүл мэндийн төлөө амьдрал, энэрэнгүй сэтгэлээ харамгүй зориулахаа тангарагласан эмч нар талийгаачийнхаа цогцсыг арьс, махнаас өөр зүйл үлдээлгүй тонохыг үзлээ. Ээжийгээ эргээд ирнэ дээ гэж санаж, "Ээжийгээ эргэн амьдруулахыг хүсэж байна" гээд нүдэндээ нулимстай бүлтгэнэн зогсоо гурван хүүхэд, ар гэрийнхэнд нь хариу ч үгүй "Уучлалт хүсэж байна" гэж хэвлэлээр ярихаас өөр юм чадахгүй хүн ёсны хүндлэл, хүнлэг сэтгэлгүй эмч, эрүүл мэндийн ажилтнуудтай юм байна. Эрүүл мэндийн салбар нь талийгаачийнхаа цогцсыг тоночихоод хийсэн зүйлдээ хариуцлага хүлээж, ажлаа ч өгч чадахгүй байхад хариуцсан сайд нь олон нийтээс нуугдчихаад ядахнаа гарч ирээд ганц мэдээлэл ч өгчихөж чадахгүй байх юм. Эх хүн эрдэнэт амиа алдахад ар гэрийнхэн нь сайхан сэтгэл гаргаж, эрхтний донор болгоё гэсэн биш талийгаачийнхаа цогцсыг тонуулчихаад нулимсаа залгин байж арайхийн оршуулчихаад байхад салбарынхаа өмнөөс уучлалт гуйж, хариуцаж ажилласан эмч нарт нь хариуцлага хүлээлгэж чадахгүй бүлтийж зогсоо Эрүүл мэндийн сайддаа хариуцлага тооцохгүй юм уу, Ерөнхий сайд аа.

-ХАРИУЦСАН САЛБАРЫНХАА ӨМНӨӨС УУЧЛАЛТ ГУЙХ СЭТГЭЛ, ХҮН ЁСНЫ ХҮНДЛЭЛГҮЙ БАЙГААД ЧИНЬ ГУТАЖ БАЙНА, С.ЧИНЗОРИГ САЙД АА-

Өнгөрсөн сард зам тээврийн осолд орж, амиа алдсан эмэгтэйн элэг, бөөрийг донор болгох хүсэлтийг холбогдох албаныхнаас ар гэрийнхэнд нь тавьж, зөвшөөрснөөр донор болгосон байдаг. Гэсэн ч талийгаачийн ар гэрийнхэн "Гэрээнд тусгаснаас өөр эрхтнүүдийг нь донор болгосон буюу талийгаачийн өвдөг, шагайг зүсэж, шөрмөсийг нь авсан байж болзошгүй байгаа. Өвдөг, шагайг нь тэр чигт зүсээд төмөр утсаар оёсон байсан. Бид маш их гомдолтой байгаа. Элэг, бөөрийг нь бусдад тус болог, амьдрал бэлэглэг гээд донор болгохыг зөвшөөрснөөс өөр эд, эрхтнийг нь авахыг зөвшөөрөөгүй" хэмээн хэвлэлд мэдээлсэн. Түүнчлэн "Бидэнд талийгаачийн эрүүл эд, эрхтнийг донор болгосны хариуд 3.5 сая төгрөг өгнө гэсэн боловч өгөөгүй" гэснээр олон нийт мэдэлгүй, хэл чимээгүй өнгөрч мэдэх эмч нарын талийгаачийнхаа цогцсыг тоносон элэг эмтрэм хэрэг ил болсон. Үүнтэй холбоотойгоор бид Эрүүл мэндийн яамны мэргэжилтэн Б-тай холбогдож тодруулахад "Талийгаачийн элэг, бөөрнөөс гадна шөрмөсийг нь донор болгох авах гэрээ байгуулсан" талаар мэдээлсэн юм. Мөн талийгаач нийгмийн даатгал төлдөггүй байсан нь Нийгмийн даатгалын газраас оршуулгын зардал болгож олгодог сая төгрөгийг эд, эрхтнийг нь донор болгосон 3.5 сая төгрөг болгон олгоход хүндрэл учруулж байгаа талаар мэдэгдээд байв.

                     Харин өчигдөр Эрүүл мэндийн яамны Эрүүл мэндийн Хөгжлийн төвийн Эс, эд, эрхтэн шилжүүлэн суулгах үйл ажиллагааг зохицуулах албан дарга П.Батчулуун талийгаачийн эд, эрхтнийг зөвшөөрөлгүй донор болгон авснаа хүлээн зөвшөөрч, уучлалт гуйж буйгаа хэвлэлээр зарлаж байх юм. Тэрбээр "Талийгаачийн эд, эрхтэнг звөшөөрөлгүй авсандаа уучлалт хүсэж байна. Ар гэрийнхэн нь сайхан сэтгэл гаргаж "Элэг нэгт монголчуудынхаа амийг аваръя" гээд талийгаачийн эрүүл эд, эрхтэнг донор болгохыг зөвшөөрсөн. Гэтэл Нийгмийн даатгалын газар нүүрээ буруулж, талийгаачийг оршуулах зардлыг шийдэж өгөөгүйд эмгэнэж байна. Үүний өмнөөс ч уучлалт хүсэж байна" гэсэн.

Улсынхаа иргэдийн амь, эрүүл мэндийг авран хамгаалж, харьшгүй сэтгэлээр зүтгэх тангараг өргөсөн эмч нь талийгаачийнхаа цогцсыг арьс, махнаас өөр зүйлгүй болтол нь тоночихоод "Уучлалт гуйж байна" гээд чимээгүй болчихов. Хүн яаж ч амьдарч, хэрхэж ч байсан нас барж болж, тэр тусмаа эрүүл эд, эрхтнээ донор болгосон талийгаачид хүн ёсны хүндлэл үзүүлж, том толгойлж, хариуцлагагүй ажилласандаа хариуцлага хүлээж, ажлаа өгөх хэрэгтэй. Үнэн хэрэгтээ эрүүл мэндийн салбар нь талийгаачдаа ч хүндлэл үзүүлж чадахгүй, цогцсыг нь тонож, мэргэшлийн бус ажиллаж байхад уучлалт гуйж, ажлаа өгөх ч багадна. Гэтэл хариуцсан салбар нь сэтгэл сэртхийлгэм хэрэг хийчихээд шийдэл, үр дүнд ч хүрсэн юмгүй нийгмээрээ сандарч байхад Эрүүл мэндийн сайд нь нүдэн балай, чихэн дүлий суугаа нь эгдүүцмээр байна.

                     Хариуцсан салбар чинь олон нийтийн дургүйцлийг төрүүлж, элгийг нь эмтрүүлж, сэтгэлийг нь сэртхийлгэж байхад түмний нүдэн дээр гарч ирээд салбараа төлөөлөөд уучлалт гуйх сэтгэл, хүн ёсны хүндлэлгүй байгаад чинь гутаж байна, С.Чинзориг сайд аа. Эрдэнэт хүний эрүүл мэнд, амь насны төлөө тангараг өргөсөн шигээ талийгаачийнхаа цогцост зүй бус хандсаныхаа хариуцлагыг хүлээж, дараа дараадаа жишээ болж, ажлаа хүлээлгэж өгөх болсон юм биш үү.