• Өнөөдөр 2026-11-16

“ХЭЛТГИЙ ЗАЯА”-ГИЙН СЭНДЭРЭЭС “АХАН ДҮҮС” ХҮРТЭЛХ ДҮРИЙН ЭЗЭН Б.ЭРДЭНЭЧИМЭГ

      Түүнийг бид “Хэтгий заяа”-гийн Сэндэрээс эхлэн олон сайхан дүрээр нь мэдэх билээ. Украйн улсын Харьков хотын урлагийн сургуулийг 1992 онд жүжигчин мэргэжлээр төгсөж ирснээс хойш Хүүхэд, залуучуудын театрт жүжигчнээр ажиллаж, өдгөө хүртлэх тайз, дэлгэцийн бүтээлд өөрийн өнгө төрх, донж маягаараа тод байсаар ирсэн уран бүтээлч бол тэр.  Тэрбээр дэлгэцнээ 1993 он "Хэлтгий заяа" -гийн Сэндэр, "Амилсан чөтгөр" -ийн Уранчимэг, 1994 он "Байлдан дагуулагч" киноны Туяа, 1995 он "Эзэнгүй айл", 1997 он "Газар шороо мину зээ" -гийн Урангуа , 1998 он "Салж чадахгүй хайр" -ын Минжин , 2001 онд "Уйлах эрхгүй хайр" -ын Номин, 2016 он "Хоёр гүүрний цаана", "Хайрын клуб" Халиуны ээж, 2020 он "Эхиймаа" киноны шоронгийн дарга, 2022 он "Нийслэл хүүхэн", 2023 он "Ахан дүүс" гэхчлэн кинонд дүр бүтээсэн байна.

      Б.Эрдэнэчимэг жүжигчин анхны дүрүүдийнхээ тухай “1992 онд Харьковтын урлагийн сургуулийг жүжигчний мэргэжлээр суралцаж төгсөөд, Хүүхэд залуучуудын театрт ажиллаж байлаа. Тэр үед Х.Дамдин найруулагч “Амилсан чөтгөр” нэртэй уран сайхны кино хийх гэж байна гээд бидний үеийн жүжигчдийг кино пробод оруулсан юм. Анх пробонд орохдоо “Миний тоглох гэж байгаа дүр эерэг үү, эсрэг дүр үү” гэж асуухад хоёрдугаар найруулагч эсрэг гэмт хэрэгтний дүр байгаа юм” гэж хариулж байсан. Анхны дүрээ эерэг дүрээр эхэлнэ гээд өөртөө амласан байсан учраас эсрэг дүр гэхэд нь дурамжхан хүлээж авч, пробдоо орчихоод яваад өгсөн. Тэгсэн киноны гол дүр болох мөрдөгч залуугийн халамжит эхнэр буюу эерэг дүрд тоглохоор сонгогдсон байсан. “Амилсан чөтгөр” киноны зураг авалт явагдаж байхад хажуугаар нь Н.Ганхуяг найруулагчийн “Хэлтгий заяа” кинонд туслах дүр бүтээгээд амжсан юм. Гэхдээ “Хэлтгий заяа” түрүүлээд нээлтээ хийчихсэн. Хэдийгээр туслах дүр ч гэсэн бөхийн тухай хийморьтой сайхан кинонд тоглосондоо, мөн “Амилсан чөтгөр” кинонд сайн эхнэрийн дүр бүтээсэндээ баярлаж явдаг шүү” гэсэн байдаг.

        Харин жүжигчин мэргэжлийг сонгосон тухайгаа “Би багаасаа инженер болох мөрөөдөлтэй байсан. Аав маань барилгын инженер, ээж минь эмч хүн байсан. Миний хувьд аавынхаа мэргэжлийг өвлөөд, хүнсний технологийн инженер болох хүсэлтэй байлаа. Тэр мэргэжлээрээ сурахын тулд тоонд сайн байх ёстой гээд нэгдүгээр сургуулийн тооны ангид шалгалт өгсөн. Тухайн үедээ шалгалт өгсөн 150 хүүхдээс дээрээсээ есөд орж байлаа. Тэгээд л долоо хоногийн таван өдөр дан тооны хичээл үзнэ. Тэгсэн яг аравдугаар анги төгсөх жил Улсын хүүхэд, залуучуудын театрын залуу боловсон хүчнийг бэлтгэх зорилготой улсын бодлогоор Москвад 20 хүүхэд суралцуулахаар шалгаруулалт болсон. Тэр үед надаас гадна манай ангийн хоёр охин, хоёр хүү бас шалгуулаад үзье гээд очсон. Тэгээд  нэг бүтэн дуу, шүлэг цээжлэх хэрэгтэй гээд биеийн тамирын хичээл дээрээ дуу, шүлгээ цээжиллээ. Сургуулийнхаа улаан буланд очсон чинь нөгөө хоёр ангийн 60 орчим хүүхэд жагсчихсан байхаар нь “Бүтэхгүй юм байна” гээд гэр рүүгээ явлаа. Манай гэр циркийн ойролцоох байранд байдаг байсан. Гэр рүүгээ алхах замд “Буцах хэрэгтэй” гэж бодогдоод болдоггүй. Тэгээд л гэртээ оролгүй үүднээсээ буцаад очсон. Ангийнхаа таван хүүхэдтэй хамт ороод шалгуулсан чинь гурав нь тэнцсэн.
       Түүний дараа хотын олон сургуулиас шалгаруулалтад тэнцсэн 40 хүүхэд нийлээд, бэлтгэл хийсээр гурван сарын дараа 20 хүүхдийг шалгаж гадаад руу явуулах болсон. Би хэдийгээр тооны ангид суралцдаг байсан ч жүжигчин хүнд ургуулан бодох, төсөөлөн бодох, сэтгэх шаардлагатай байдаг учраас тоо маань жүжигчний мэргэжилд нөлөөлсөн болов уу” гэж ярьсан байдаг. Украйнд сургуулиа төгсөж ирээд, мөн “Шинэ үе” продакшнд жүжигчнээр ажиллаж байжээ. Тэгээд ажиллаж байгаад кино руу орж, дараа нь багш болж, өдгөө ч хүүхдүүдэд сурсан мэдсэнээсээ хуваалцаж буй. Энэ жил Монголын театрын ууган байгууллага Улсын драмын эрдмийн театрын 95 жилийн ой тохиож, энэ үеэр тэрбээр Хөдөлмөрийн Гавьяаны улаан тугийн одонгоор энгэрээ мялаасан юм. Багшлахын зэрэгцээ кинондоо ч ажиллаж хэзээний завгүй энэ л уран бүтээлч өдгөө ч эрч хүч дүүрэн ажилласаар байна. 

“ХЭЛТГИЙ ЗАЯА”-ГИЙН СЭНДЭРЭЭС “АХАН ДҮҮС” ХҮРТЭЛХ ДҮРИЙН ЭЗЭН Б.ЭРДЭНЭЧИМЭГ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188