Баянзүрх дүүргийн нутаг дэвсгэрт байрлах “Энэрэл” эмнэлгийн гадна нэгэн иргэн тусламж авч чадалгүй эмнэлгийн гадна нас барсан хэрэг долдугаар сарын 3-нд гарсан. Талийгаач Р Баянзүрх дүүрэгт хаягтай Чингэлтэй дүүргийн зургадугаар хороонд түр оршин суудаг байжээ. Талийгаач гэртээ түргэвчилсэн орошлуураар өөртөө сорил тавихад хариу эерэг гарч, улмаар түргэн тусламж дуудан үзүүлсэн байна. Гэтэл түргэн тусламжийн эмч үзээд харьяа дүүргийн эмнэлэгтээ хандан үзүүлэхийг зөвлөөд орхиж явжээ. Талийгаачийг Баянзүрх дүүргийн эмнэлэгт очиход харьяаллын бус гэсэн шалтгаанаар хүлээж авалгүй үүднээсээ хөөсөн байна. Улмаар талийгаач Р харьяалалгүй иргэдийг хүлээн авдаг гэх “Энэрэл” эмнэлэгт үзүүлэхээр очсон ч эмнэлгийн гадна тусламж авч чадалгүй нас баржээ.

          Хэргийн мөрөөр шалгаж, тодруулахад “Нийслэлийн эрүүл мэндийн газрын харьяа Түргэн тусламжийн 103 алба, Баянзүрх дүүргийн эмнэлгийн удирдлагууд, ажилтнуудад хариуцлага тооцож, албан тушаалаас нь чөлөөлөх арга хэмжээ авлаа” гэв. Түргэн тусламжийн 103 төвийн дарга  Р.Пүрэвдаш, НЭМГ-ын эмнэлгийн тусламжийн хэлтсийн дарга М.Мөнхдэлгэр, “Энэрэл” эмнэлгийн дарга Н.Амартүвшин нарыг албан тушаалаас нь чөлөөлжээ. Нэр дурдсан албан тушаалтнууд эрүүл мэндийн салбарт олон жил үр бүтээлгүй шигдсэн, эрх мэдэлтнүүдийн шахалтаар томилогдсон “этгээд”-үүд ажээ. Жишээ нь, НЭМГ-ын эмнэлгийн тусламжийн хэлтсийн дарга М.Мөнхдэлгэр нь гэр бүлийн хүн Б.Батбаярыг хотын дарга байхад ашиг сонирхлын зөрчилтэйгээр томилогдсон гэнэ. Түргэн тусламжийн 103 төвийн   Р.Пүрэвдаш нь тэтгэврийн нас болсон ч албан тушаалдаа “шигдэн хоргоддог” бол Н.Амартүвшинг “Энэрэл” эмнэлгийн даргаар томилоход хуучин хотын дарга биечлэн нөлөөлж байсан гэнэ.

Яаралтай тусламжийн төв 103, Энэрэл эмнэлэг, дүүргийн эмнэлэг нь яаманд захирагддаггүй, Нийслэлийн эрүүл мэндийн газрын шууд удирдлагад багтдаг юм байна. Дунд шатанд үүрэлсэн эдгээр дарга нар нь аль ч засгийн үед сайдын үгэнд бус дүүрэг, хотын даргын заавраар ажлаа хийсэн дүр эсгэсээр иржээ. Дунд шатны ужгирсан, олон жил дарга хийсэн чадваргүй, сэтгэлгүй дарга нарын “ажлын гор” нь хүний амиар “төлөгдөж” байна.

          Харин хэсгийн ахлагчийнх нь мэдээлснээр иргэн Р уушгины хатгаатай гэсэн рентген оноштой, олон өдрийн согтууруулах ундааны зүйл хэрэглэсэн, бүртгэлээ зохих ёсоор хийлгээгүй, бичиг баримтгүй байсан зэрэг хүндрүүлэх шалтгаан гаргасан ч энэ бол Нийслэлийн эрүүл мэндийн салбарт үүрлэсэн, олон жил бугшсан “мафижсан” бүтэц, эрүүл мэндийн үйлчилгээний хурд, чанар чадавхийг танил тал харж хийсэн томилгоогоор сулруулснаас үүдэлтэй эмгэнэлт хэрэг юм.

          Баянзүрх дүүргийн нэгдсэн эмнэлэг дээр тусламж авахаар ирсэн иргэдэд чирэгдэл учруулсан, хохироосон явдал удаа дараа гарч байгаа юм. 2001 онд дүүргийн эмнэлгийг менежментийн хувьчлалаар хувьчилснаар иргэдэд ээлгүй байдал үүсжээ. Тийм учраас энэ эмнэлгийн хувьчлалыг эргэн харах, гэрээг дүгнэх, шаардлагатай тохиолдолд тусгай зөвшөөрлийг нь цуцлах ч шаардлага үүсэхээр байна. Иргэн Р-ийн амь насаа алдсан хэрэгт Баянзүрх дүүргийн эмнэлгийн шууд буруутай үйл ажиллагаа гол нөлөө үзүүлсэн гэдгийг Нийслэлийн Эрүүл мэндийн газрын удирдлага мэдээлэл хийхдээ тодотгожээ. Цар тахлын онцгой үед харьяалал харгалзахгүй эмнэлгийн тусламж үйлчилгээг үзүүлэх заавар, зөвлөмж, тушаал байсаар байтал үл хайхарч, өөрсдөөсөө “зайлуулсан” нь хууль зөрчсөн хэрэг гэж болно. Тус эмнэлгийн зүгээс яаралтай арга хэмжээ авсан бол талийгаач Р өнөөдөр амьд байх боломжтой байлаа. Иргэн Р-ийн амиа алдсан эмгэнэлт явдлыг Баянзүрх дүүрэгт дахин давтахгүйн тулд тус эмнэлгийн хувьчлалыг эргэн харж, удирдлагыг сольж, үйл ажиллагааг шинэчлэхээс өөр гарц байхгүй бололтой.

          Энэ эмгэнэлт явдлын цаад угт эмнэлгийн ажилтнууд үүргээ бүрэн ухамсарладаггүй, онцгой нөхцөлд ажиллах дүрэм журмыг сахиж,мөрддөггүй, эмнэлэгүүд иргэдийг чирэгдүүлж хоорондоо шидэлцэн хугацаа алддаг, хариуцлагаас зайлс хийж, нэгэн рүүгээ чихдэг, тусламж авахаар ирсэн хүнд яаралтай үйлчилгээ үзүүлэхийн оронд бүртгэл, бичиг цаасыг чухалчилдаг гэх мэт хариуцлагагүй байдал даамжирсан явдал бий. Эмнэлэг, эрүүл мэндийн салбарт яаралтай шинэчлэл хийж, хүний нөөцийг чадваржуулах, хариуцлагыг дээшлүүлэхгүйгээр хүн ардад эмнэлгийн тусламж үйлчилгээг шуурхай, хүндрэлгүй хүргэх боломж хомс байх нь энэ хэрэг явдлаас тодорхой боллоо. Эрүүл мэндийн сайд одоо зоригтойгоор хүний нөөцийн  хийх, төрийн дунд, доод шатанд бугшин ужгирсан “мафижсан” бүтцийг задлах шаардлагатай болжээ.

          “Мафижсан” бүтэц ажлын хариуцлагыг умартсаны гайгаар Эрүүл мэндийн холбогдолтой төрийн хууль тогтоомжууд газар дээрээ хэрэгжихгүй байх нь түгээмэл. Яаралтай тусламж шаардлагатай иргэнд харьяалал харгалзахгүйгээр үйлчлэх эрхийг хуулиар олгосон. Гэтэл иргэн Р-ийн харьяа эмнэлэг рүүгээ яв, нэр нь  алга, улаан бүсийн, зорилтот бүлгийн эмнэлэг гэхчлэн шалтаг тоочиж, хүнд суртал гаргасан нь хуулийг ноцтой зөрчсөн хэрэг юм. Ийм байдлаар “дунд шатны мафижсан” бүтэц иргэдийн амь нас, эрүүл мэндэд халдсаар байх уу.

Аливаа асуудлын шийдэл нь үргэлжид хүн, хүний нөөцийн чадавх байдаг. Эрх мэдэлтнүүдийн шахалт, нөлөөллөөр томилогдсон хүний нөөц эрүүл мэндийн салбарын доройтуулж, ялзруулж байгаад анхаарах цаг болжээ.