-УЛСТӨРЧИЙНХӨӨ ХУВЬД БОЙЖИЖ АМЖААГҮЙ ЯВАА М.ОЮУНЧИМЭГ-

      МАН-ын нөмөр, нөөлөгт олон жил “бээвийж”, “бэвтнэж” суугаа М.Оюунчимэг гишүүн улс төрийн гол тоглогч болж харагдах гэж хэрэндээ л хичээх юм.  Даанч тэр улс төрийн  гол тоглогч, даацтай улстөрчийн дүрд тоглох гэж оролдох бүрдээ бүтэлгүйтэж, сонгогдсон тойргийнхныхоо төдийгүй ард олны амны бай, хошин ярианых нь сэдэв, “сошиал од” болоод л дуусах шинжтэй шүү, янз нь.

    Өнөөгийн парламентад намынхаа нэрээр халхавч хийгээд чимээгүйхэн Төрийн ордонд заларчихсан сул гишүүн олон бий. Үүний нэг нь Чингэлтэй дүүргээс сонгогдсон УИХ-ын гишүүн М.Оюунчимэг. Сэтгүүлчийн ширээнээс улстөрчийн ширээнд тухласан тэрбээр хийж гийгүүлсэн ажлаасаа илүү хэл амтай, заргач, хийсэн хэргээ хүлээхгүй мэлздэгээрээ алдаршиж, Саарал ордноор нэг будилаан тарьж, аль болохгүй хэрэгт нэр, ам хоёр нь хутгалдчихдаг сул талтай. Товчхондоо, түүнийг “давилуун, туйлбаргүй” хэмээн нэрлэж болмоор ч юм шиг санагдав. Улстөрчийнхөө хувьд өөрийнхөө үзэл бодолдоо үнэнчээ баталж чаддаггүй, улстөрч хэмээх нэрээс зургаан жил зүүгдээстэй явахдаа ядаж сонгогдсон тойрогтоо гарт баригдаж, нүдэнд үзэгдэж, нүүр тахалчихаар олигтой ганц ч ажил хийгээгүйд нь сонгогчид нь гомдож, халаглаж, өмнөөс нь нүүр нь улайж суугаа гэгддэг. М.Оюунчимэг гишүүн хоёр удаагийн парламентад дараалан сонгогдчихсондоо эрдэж, “нялх” гишүүдийнхээ дэргэд зангарагтай загнах гэж хичээдэг ч улстөрчийнхөө хувьд бойжиж амжаагүйг илтгэх түүний зарим жишээг дурдъя.

-“БООВ” ХЭМЭЭХ ХОЧ АВЧ, ГИШҮҮНИЙ АЖЛАА ЭХЛҮҮЛЖ БАЙВ-

     М.Оюунчимэг 2016 онд УИХ-ын гишүүн болохдоо л  “Боов” хэмээх хочтой болж болсон түүх нь Байнгын хорооны хуралдааны үеэр үдийн цайндаа боов идэж, инээмсэглэн суугаа бичлэг нийтэд ил болсноор эхэлдэг юм. Мөн тэрбээр алдарт ЖДҮ-ийн хэрэгт нэр холбогдож, ЖДҮХС-гаас нөлөө бүхий албан тушаалтан, гишүүд зээл авахад жуучлагчаар ажиллаж, 120 сая төгрөгийн авилга авсан гэх үндэслэлээр АТГ-аас шалгаж байсан удаатай. Гэлээ ч үүнийгээ булзааруулах гэж “Би үүнд буруугүй, үүнийг шалгуулна” гээд хир хүргэхгүй өөрийгөө  өмгөөлж байгаад Улсын Ерөнхий прокуророос хатуу сануулга авсан. Мөн Хөдөлмөр эрхлэлтийг дэмжих сангаас эрх мэдэл албан тушаалаа урвуулан ашигласан зээл авсан байж болзошгүй гэх хэрэгт нэр холбогдож байсан түүхтэй. УИХ-ын гишүүн болсноос хойш түүний болон гэр бүлийнх нь Хөрөнгө орлогын мэдүүлэг дөрвөн жилийн дотор 15 сая төгрөгөөр огцом нэмэгдсэн байгаа  гээд тоочоод үзвэл түүнд сайн нэр үнэндээ алга.

-М.ОЮУНЧИМЭГ ХҮҮГЭЭ ТӨРИЙН МӨНГӨӨР СУРГАЖ, ДАРГА БОЛГОЖ БАЙВ-

      УИХ-ын гишүүн М.Оюунчимэгийн хүү Б.Энхмөрөн Эрүүл мэндийн даатгалын ерөнхий газрын Худалдан авалт гэрээлэлтийн газрын даргаар томилогдож байв. Түүнийг өнгөрсөн нэгдүгээр сарын дундуур дээрх албанд томилсон гэдэг дуулиан дэгдэж байлаа. Хамгийн гол нь энэ албыг хаших хүн нь наймаас доошгүй жил төрийн албанд ажилласан, мэргэшүүлэх сургалтад хамрагдсан байх зэрэг шаардлага тавигддаг ч Б.Энхмөрөн шаардлага хангах нь битгий хэл Төрийн албаны шалгалтдаа тэнцээгүй хэмээн олны шүүмжлэлд өртөж байсан. Түүгээр ч зогсохгүй эрхэм гишүүн хүүгийнхээ сургалтын төлбөрийг Боловсролын зээлийн сангаас төлүүлчихээд зээлээ ч төлөөгүй төрийн албанд даргаар томилсон байгаа юм.

-М.ОЮУНЧИМЭГ "КАПИТАЛ” БАНКНААС  ГУРВАН ТЭРБУМЫН ЗЭЭЛ АВСАН УУ-

    Монгол Улсын Засгийн газраас хаалгаа барьсан "Капитал" банкны хөрөнгийг дуудлага худалдаагаар зарж, хоёр санд төвлөрүүлэх шийдвэр гаргаж байсан. Тэгвэл "Капитал" банкнаас нэр бүхий улстөрчид эрх мэдэл, албан тушаалын байдлаа ашиглаж хамаарал бүхий компаниараа дамжуулж их хэмжээний зээл авсан нь ил болж байгаа. Тэдний нэг болох М.Оюунчимэг гишүүн гурван тэрбумын зээл авсан хэмээн яригдаж, олон нийтийн сүлжээгээр цацагдаж буй.

-М.ОЮУНЧИМЭГ ОМИКРОН ХУВИЛБАР ТАРХСАН БАЙСНЫГ НУУСАН БАЙЖ БОЛЗОШГҮЙ-

      Тэгвэл омикрон хувилбар илэрснийг нуун дарагдуулж, иргэдийн амь насанд занилхийлсэн, халдварт өвчнийг бусаддаа үгсэн хуувилдаж, нуусан байж болзошгүй УИХ-ын гишүүн М.Оюунчимэгийг иргэн Д.Мөнхбатыг яллаж буй Эрүүгийн хуулийн 15.6.1 дэх хэсэг “Бусдын амь насанд аюул учруулж болзошгүй халдварт өвчин бусдад халдаах, эсхүл тархах нөхцөл бүрдүүлсэн” гэх зүйл ангиар Эрүүгийн хэрэг үүсгэх ёстой  байв. Учир нь, УИХ-ын гишүүн М.Оюунчимэг “Монголын Засгийн газар өнгөрсөн сард омикрон тархсан байсныг нуусан” гэх утга бүхий жиргээг твиттер хуудастаа оруулсан байдаг. Тодруулбал, тэрбээр “Угаасаа л шинэ жилийн өмнө тархсан байсан л даа. Гэнэт тархсан мэт ярихаа болих хэрэгтэй. Зүгээр л тайван бэлэн байдлаа хангацгаая. Гол нь амны хаалтаа тогтмол зүүж, олон нийтийн газар, шоу цэнгээнээс хол байцгаая. Зайгаа барьцгаая. УОК, ЭМЯ сүржигнэх хэрэггүй” гэж бичсэн байдаг.

      УИХ-ын гишүүн, Нийгмийн бодлогын байнгын хорооны дарга М.Оюунчимэг хурлын үеэр "Коронавирусийн халдвараар өвчлөөгүй 2.7 сая хариуцлагатай иргэнд талархлаа илэрхийлж, нэг удаагийн урамшуулал олгох нь зүйтэй. Нэгдүгээрт, талархлаа илэрхийлж, хоёрдугаарт, тэр хүмүүстээ нэг удаагийн дэмжлэг юм уу сувилалд хамруулдаг ч юм уу, 2022 оны төсөвт ч гэсэн иймэрхүү хүмүүстээ яаж хандах талаар бодолцох хэрэгтэй.  Нийгэмдээ хариуцлагаа ухамсарлаад, цар тахлаас өөрийгөө болоод эргэн тойрноо хамгаалаад явж байгаа 2.7 сая хүндээ бид талархах ёстой. Хүмүүс хараад, биеэ зөв авч явдаг, эрүүл байдаг, дархлаатай байдаг хүмүүсээ ингэж гоё урамшуулдаг юм байна. Би бас анхаарах ёстой юм байна гэсэн ёс зүй төлөвшүүлж, төсөв төлөвлөгөөтэйгөө уях ёстой" хэмээгээд олны инээдийг барж байсан юм.

-М.ОЮУНЧИМЭГ САНГИЙН САЙД АСАН Ч.ХҮРЭЛБААТАРЫН ХҮН ҮҮ-

     УИХ-ын гишүүн М.Оюунчимэг 1995 онд ОХУ-ын Ленинградын Их сургуулийг сэтгүүлч мэргэжлээр төгссөн. Улмаар МҮОНРТ-д сэтгүүлч, редактор, тоймч, “ММ” агентлагийн ерөнхий редактор, захирлаар 2009 он хүртэл ажилласан. Ингээд 2009 онд ЗГХЭГ-ын Хэвлэл мэдээллийн албаны дарга, Ерөнхий сайдын хэвлэлийн төлөөлөгч болж, улс төрд хөл тавьсан. Түүнийг Сангийн сайд асан Ч.Хүрэлбаатар ЗГХЭГ-ын Хэвлэлийн албанд дуудаж авчирч оруулсан гэдэг. Улмаар 2013 онд МАН-ын нарийн бичгийн дарга болж, 2016 онд УИХ-ын гишүүнээр сонгогдсон билээ.

      Энэ мэтчилэн өнөөдрийг хүртэл түүний нэр холбогдсон дуулиантай, хоржоонтой "явдлууд" тасралтгүй үргэлжилсээр. М.Оюунчимэг гишүүн ч юм бүхэнд хошуу дүрэх санаатай, нөгөө л зангаараа хүссэн үедээ хүссэн сэдвээрээ жиргэчихээд л, эвгүйтвэл эвтэйхэн бултчихаад л суух юм. Өөрөөр хэлбэл, түүнийг бааварлах ч учраа олохгүй будилж байх зуурт нь улстөрчийнх нь замнал дуусчих вий дээ.