ЗТХЯ-ны сайд Л.Халтарын хууль бус гэрээ, үйлдлийн талаар Авто замын мэргэжлийн холбоо, иргэдийн төлөөлөл мэдээлэл хийлээ.

Авто тээврийн мэргэшсэн инженер Ж.Энхбат:

“Манай салбарын үйл ажиллагаа их доголдож байна. Тэр тусмаа Зам Тээврийн сайд Л.Халтар төрийн бус байгууллагатай гэрээ байгуулж төрийн чиг үүргийг мэргэжлийн бус байгууллагад шилжүүлсэн явдал хүндрэл учруулж байна.

Тодруулбал, Өмнөговь аймгийн Цогтцэций сумаас Говьсүмбэр аймгийн Чойр сум хүртэл 407 км  автозамын арчлалт, засварын ажил, авто замын постууд, авто тээврийн хяналтын үйл ажиллагааг хариуцуулахаар Баянзам ТББ-тай гэрээ байгуулсан.

 Улмаар иргэд, тээвэрчид энэ замаар зорчихын тулд тухайн ТББ-тай гэрээ байгуулж, QR код авах шаардлага үүссэн.

Энд буй нэг ноцтой заалт нь :

"Баянзам" ТББ нь зам засвар арчлалт хариуцсан нэрийн дор туслан гүйцэтгэгчээр дамжуулан их хэмжээний мөнгө татан төвлөрүүлж, нүүрс худалдан авагч, тээвэрлэгч байгууллагуудын үндсэн дээр тээвэрлэлтийн үйл ажиллагаа гүйцэтгэж байна. Өмнөговь аймгийн Цогтцэций сумаас Чойрын чиглэлд нүүрс тээвэрлэх, худалдан авах гэрээ байгуулсан тээвэрлэгч бүрээс 120 сая төгрөг, тээвэрлэлтийн тонн тутмаас 5300 төгрөг, нэг ресс тутмаас 444,000 төгрөг, QR олгох нэрийдлээр пост болгоноос хураамж авч байна. Энэ татвар хураамжийг хууль бус гэж тээвэрчид үзэж байна.

Энэ хууль бус гэрээгээ нэн яаралтай буюу долоо хоногийн хугацаанд цуцлахыг Зам тээврийн сайд Л.Халтараас шаардаж байна. Эс бөгөөс дараа дараагийн актуудыг тээвэрчдийнхээ өмнөөс гаргах болно” гэлээ.

Л.Дэлгэрмаа