Засгийн газрын хуралдаанаас гаргасан шийдвэрийг танилцуулж байна.

         Энэ үеэр Аж үйлдвэр, эрдэс баялагийн сайд Ж.Туваан "Монгол Улсын Засгийн газар, БНХАУ-ын Засгийн газар хооронд Гашуунсухайт-Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээрийг байгуулахад баримтлах үндсэн чиглэл батлах тухай" гэсэн тогтоолын төслийг өргөн барьж байгаа. Хоёр улсын хил дамнасан төмөр замын боомтуудын бүтээн байгуулалтын ажил нэлээд хугацаа алдаж, сунжирсан байдаг. Энэ асуудлыг шийдэхийн тулд хоёр улсын Засгийн газар хоорондын хэлэлцээрийн гэрээг байгуулах замаар энэ асуудлаа шийдэх шийдвэр гарчээ. Энэ шийдвэртээ хүрэхийн тулд УИХ-аас чиглэл авах тогтоолын төсөл санаачилж өргөн барьж байна. Тогтоол батлагдсаны дараа хоёр улсын хоорондох хэлэлцээр рүүгээ орно. Хэлэлцээр хэлэлцэгдсэний дараа УИХ-аар соёрхон батална. Энэ хооронд хоёр улсаас Ажлын хэсэг байгуулагдаад ажиллаж байгаа. Монголын талын Ажлын хэсгийг би ахалж байгаа. Ажлын хэсэг 60 орчим удаа хуралдсан. Өнөөдөр ч үргэлжлээд явж байгаа. Мөн үүний дараа хоёр төрийн өмчит компани буюу "Эрдэнэс Таван толгой", "Чайна энержи" компани хоорондоо гурвалсан гэрээ байгуулснаар үйл ажиллагаа эхлэх юм" гэв.