Өчигдөр монгол оронд 500 гаруй удаа газар хөдлөлтийн чичирхийлэл мэдрэгджээ. Үүнээс хамгийн хүчтэй буюу Говьсүмбэр аймгийн Баянтал сумаас хойш 16 км-ийн зайд 22:46 цагт 5.5 магнитуд хүчтэй газар хөдөлсөн байна. Түүнчлэн газар хөдлөлтийн чичирхийлэл Улаанбаатар хотод тодорхой хэмжээгээр мэдрэгдээд буй.

Түүнчлэн газар хөдлөлтийн өмнө Хан-Уул дүүргийн Зайсанд байрлах "Жардан" хотхонд тарвага орж ирсэн бичлэг цахим орчинд нийтлэгдсэн. Тэгвэл үүнтэй холбоотой "Газар хөдлөлтийг ан амьтад хамгийн түрүүнд мэдэрдэг бөгөөд тарвага нүхнээсээ гарах нь газар хөдлөлтийн дохио байсан" гэж иргэд байр сууриа илэрхийлсээр байгаа юм.

Энэ талаар бид Богд хан уулын Дархан цаазат хамгаалалтын захиргааны байгаль хамгаалагч Г.Барайшираас тодрууллаа. Тэрбээр "Тухайн үед хотхонд тарвага орсон мэдээллийг аваад бид цаг алдалгүй очсон. Биднийг очиход тарвага хашаанаас гарчихсан байсан. Тарвага орсон гээд байгаа хэсэг нь суурьшлын бүс биш. Амьтны байршил дээр нь хүмүүс байгаад байгаа юм. Ер нь тарвага, зурам энэ хэсэгт орж, гараад явдаг. Яг газар хөдлөлттэй холбоотой гэж тайлбарлахад хэцүү. Энэ бичлэг хийсэн газартай тарваганы ичээ ойрхон байдаг юм. Одоо тарваганы ороо, хөөцөлдөөний үе эхэлчихсэн учраас эр тарваганууд бие биенээ нүхнээсээ хол хөөх тохиолдол гардаг.

Гэхдээ тарвага газрын гадарга дээр бус, гүнд нь байдаг учраас газар хөдлөлтийн чичирхийллийг түрүүлж мэдрэх магадлалтай" гэсэн юм.