Монголын айкидо холбоонд 2026 оны наймдугаар сарын 13-ны өдөр Япон Улсаас Монгол Улсад суугаа Онц бөгөөд Бүрэн эрхт Элчин сайдын өргөмжлөл гардууллаа. Монголын айкидогийн түүх 1993 онд Г.Лхагвасүрэнгийн санаачилга, хичээл зүтгэлээр эхэлсэн билээ. Тэрбээр Монголын айкидо холбоог үүсгэн байгуулж, анхны зохицуулагчаар ажиллахын зэрэгцээ айкидог Монгол Улсад системтэйгээр хөгжүүлэхээр уйгагүй хөөцөлдөн, ЖАЙКА-гийн шугамаар Япон Улсаас анхны айкидо багшийг урьж авчирсан юм. Ингэснээр Монголд айкидогийн тогтмол бэлтгэл, сургалтын үндэс суурь тавигдаж, өнөөдөр албан ёсны 33 жилийн түүхтэй холбоо болон өргөжин хөгжжээ.

     Энэ хугацаанд Монголын айкидо холбоо айкидогийн урлаг, хүмүүжлийн үнэт чанарыг эх орондоо түгээн дэлгэрүүлжээ. Олон зуун шавь бэлтгэхийн зэрэгцээ Япон Улсын айкидогийн төв байгууллагуудтай тогтвортой харилцаж иржээ. Япон багш, дасгалжуулагчдыг урин оролцуулсан сургалт, семинарууд оролцдог байна.  Монголын айкидогийн ур чадвар, сургалтын чанарыг ахиулаад зогсохгүй Монгол, Японы ард түмний найрамдал, харилцан ойлголцлыг бэхжүүлэхэд үнэтэй хувь нэмэр оруулсан юм.

    Айкидо бол өрсөлдөгчөө ялах тухай бус, өөрийгөө ялан дийлэх, хүчийг хүчээр бус ухаан, эв зохицлоор удирдах зам билээ. Энэхүү замыг Монголд эхлүүлж, тасралтгүй үргэлжлүүлэхэд сэтгэл зүрх, хөдөлмөрөө зориулсан үүсгэн байгуулагч, үе үеийн удирдлага, багш, дасгалжуулагч, шавь нарын хамтын хичээл зүтгэлийг ийнхүү өндрөөр үнэлсэн нь бид бүхний хувьд нэр төрийн хэрэг юм.