Олон улсын жүдо бөхийн холбоо (IJF)-ны 2023 оны хоёр дахь “Их дуулга” тэмцээн Израиль Улсын Тель-Авив хотод өнөөдөр эхэлнэ. Энэ удаагийн гранд слам тэмцээнд 52 орны эрэгтэй 224, эмэгтэй 174, нийт 398 бөх барилдах мэдүүлэг өгсөн байна.

             Тэмцээний эрэгтэйчүүдийн 60 кг-ын жинд 30 бөх барилдана. Энэ жинд манай ОУХМ Э.Сумъяабазар, Б.Сүхбат нар хүч сорино. Б.Сүхбат “В” хэсгийн нэгдүгээр тойрогт Францын Мкэйнзитэй, Э.Сумъябазар “С” хэсгийн нэгдүгээр тойрогт Францын Мерлинтэй таарчээ. 66 кг-ын жинд  32 бөх байна. Л.Өнөболд “D” хэсгийн нэгдүгээр тойрогт Францын Чазорлатай хүч үзнэ.

         Эрэгтэйчүүдийн 73 кг-д 37 бөх байна. Дэлхийн аварга, гавьяат тамирчин Ц.Цогтбаатар “А” хэсгийг толгойлон Шакостай таарсан. Б.Эрдэнэбаяр Израилийн Сахартай барилдана. 81 кг-ын жинд 35 бөх байна. Г.Болор-Очир “D” хэсгийн нэгдүгээо тойрогт, Азербайжаны Рустан Оружовтай барилдах юм. 90 кг-ын жинд 44 бөх байгаа. Г.Алтанбагана “А” хэсгийн эхний тойрогт хийлсэн. Хоёрдугаар тойрогт Вреятенвач, Целидис нарын хэн ялсантай барилдана. “С” хэсгийн хоёрдугаар тойрогт Г.Пунцагцэрэн, Клергет, Михаел нарын ялсантай барилдах юм. +100 кг-ын жинд 20 бөх байна. О.Цэцэнцэнгэл “С” хэсгийн нэгдүгээр тойрогт Польшийн Сордялтай таарсан.

            Эмэгтэйчүүдийн 48 кг-ын жинд 23 бөх байна. ОУХМ Г.Наранцэцэг “В” хэсгийн нэгдүгээр тойрогт хийлсэн. Хоёрдугаар тойрогт Чер, Домниканы бөхчүүдийн нэг ялсантай барилдана. 52 кг-ын жинд 23 бөх барилдана. М.Нандин-Эрдэнэ “В” хэсэгт эзэн орон Израилийн Кафритай хүч үзнэ. Хэрэв ялах юм бол хоёрдугаар тойрогт Бразилийн Пимета, Италийн Одета Гуффрида нарын ялсантай барилдах юм. 57 кг-ын жинд 34 бөх байгаа. О.Оюунчимэг “D” хэсгийн нэгдүгээр тойрогт Украины Чязхевскатай таарсан. Түүнийг ялах юм бол хоёрдугаар тойрогт Бразилийн Силва, Польшийн Подолак нарын хэн хожсонтой барилдана. Энэ жингийн “В” хэсэгт Японы Йошида Цукаса, Украины Блилиодид нар тулна.

                Эмэгтэйчүүдийн 63 кг-ын жинд 26 бөх байгаа.  Д.Есүй “В” хэсгийн эхний тойрогт Францын олимп, дэлхийн аварга Агвегненоутай таарсан. 70 кг-ын жинд “С” хэсгийн эхний тойрогт Б.Баасанжаргал, Узбекистаны Матнияазоватай барилдана. Харин “В” хэсгийн нэгдүгээр тойрогт Б.Ням-Эрдэнэ Бразилийн Кастилхостой таарлаа. -78 кг-ын жинд 17 бөх барилдана. О.Хүслэн “С” хэсгийн нэгдүгээр тойрогт Италийн Белландитай хүч үзнэ. +78 кг-ын жинд 19 бөх байгаа. Д.Номинзул “D” хэсгийн нэгдүгээр тойрогт Германы Воуизгарнетай барилдана. Тус тэмцээний шигшээ барилдааныг 16, 17, 18-ны өдрүүдийн 22:50 цагаас "С1" телевизээр шууд дамжуулан үзүүлнэ.