Олимпын хөдөлгөөн газар хөдлөлтийн гамшигт нэрвэгдсэн Турк, Сири Улсад туслах зорилгоор яаралтай тусламжийн сан байгуулснаа зарлалаа. Онцгой байдлын сан нь нэг сая ам. долларын төсөвтэй бөгөөд үүний 750 мянгыг ОУОХ, Азийн олимпын зөвлөл, Европын олимпын хороо тэнцүү хуваан гаргах бол үлдсэн хэсгийг Олимпын дүрвэгсдийн сангаас гаргах юм.

           ОУОХ-ны ерөнхийлөгч Томас Бах “ Бид Турк, Сирийн бүс нутагт болсон газар хөдлөлтийн улмаас олон хүний амь эрсэдсэнд гүнээ эмгэнэж байна. Би Турк, Сирийн Үндэсний олимпын хорооны ерөнхийлөгч нартай ярилцаж, олимпын нийгэмлэгийн гишүүдэд газар хөдлөлт хэрхэн нөлөөлсөн талаар сонссон.

         Хохирогчдын дунд олон тамирчин, олимпын нийгэмлэгийн гишүүд байсан бөгөөд олон хүн орон гэргүй болж, спортын дэд бүтэц ихээр сүйдсэн байна. Бид олимпын нийгэмлэгийн гишүүдээ хэрхэн дэмжих талаар нухацтай ярилцсаны үндсэн дээр Азийн олимпын зөвлөл, Европын олимпын хороо, Олимпын дүрвэгсдийн сантай хамтран яаралтай тусламжийг эхлүүлэхээр шийдээд байна” хэмээн өгүүлжээ.