Монгол Улсын Хөдөлмөрийн баатар, Ардын багш, гавъяат дасгалжуулагч Ч.Насантогтохын нэрэмжит жүдо бөхийн өсвөр үеийн олон хотын тэмцээн энэ сарын 6-наас 8-ны өдрүүдэд амжилттай зохион байгуулагдаж өндөрлөлөө.

          Өвөрхангай аймгийн Арвайхээр хотноо явагдсан тус тэмцээнд нийт 44 байгууллагын 1000 гаруй өсвөрийн жүдочид гурван насны бага, дунд, ахлах ангилалд ур чадвар, авхаалж самбаагаа сорин өрсөлдсөн юм.

       “Монголын жүдо академи”-ийн баг тамирчид энэ тэмцээнд нийт 35 тамирчны бүрэлдэхүүнтэй оролцож 17 медаль хүртсэн амжилт үзүүллээ. Зургаан алт, гурван мөнгө,  найман  хүрэл медаль хүртжээ.

        Багийн дүнгээр “Монголын жүдо академи” эрэгтэй бага, дунд насанд гуравдугаар байр, эрэгтэй ахлах насанд тэргүүн байр эзэлж алтан цомын эзэн болсон байна. Мөн тэмцээний “Эмэгтэй шилдэг тамирчин”-аар бүх өрсөлдөгчөө “Иппон”-оор буулгаж авсан Х.Ариунтунгалаг (-57 кг) тодорчээ.