ОХУ-д зохион байгуулагдаж байгаа “Триумф Energy” 15 хүртэлх насны өсвөр үеийн жүдо бөхийн лигт “”Монголын жүдо академи” эх орноо төлөөлөн оролцож байна.  ОХУ-д 2020 онд үүсгэн байгуулагдсан олон улсын энэхүү лигт энэ жил ОХУ, Монгол, Беларусь, Казахстан, Абхаз гэсэн нийт таван орны 2000 гаруй өсвөрийн жүдочид долоон дивизионд хуваагдан хүч чадал, авхаалж самбаагаа сорин өрсөлдөж байгаа юм.

        “Монголын жүдо академи” нь тэмцээний алс дорнодын холбооны бүсэд харьяалагдаж байгаа бөгөөд эхний тойргийн барилдаануудаа нэгдүгээр сарын 28-29-ний өдрүүдэд Чита хотноо хийсэн байна. “Триумф Energy” лигийн дараагийн тойргийн барилдаанууд ирэх гуравдугаар сард Улаан-Үд хотноо явагдана. Мөн тус тойргийн өмнө “Жүдо академи”-ийн баг тамирчид Улаан-Үд хотын "Иппон" клубтэй хамтарсан бэлтгэл хийх юм. Энэхүү тэмцээнд баг тамирчдын оролцох боломжийг бүрдүүлж өгсөн “Монголын жүдо академи”-ийн Удирдах зөвлөлийн дарга, олон улсын шүүгч М.Бөхбатад гүн талархал илэрхийлж байна.