Өнөөдөр олимпын хүрэл, ДАШТ-ий хошой хүрэл медальт, Азийн аварга, Казахстан Улсын гавьяат тамирчин Галбадрахын Отгонцэцэгийн төрсөн өдөр тохиож байна. Тэрбээр Казахстан Улсын нэрийн өмнөөс тэмцээнд оролцон, “Эсгий туургатны эв нэгдлийн бэлгэдэл” болон олимп, дэлхийн медальтан болж, монгол жүдочийн ур чадвар, авьяасыг дэлхийд харуулсан юм.

           Одоо Рио-2016” олимпын хүрэл медальт, ДАШТ-ий хошой хүрэл медальт, жүдоч Г.Отгонцэцэг эх орондоо эргэн ирж нийслэл хотноо жүдо бөхийн клуб байгуулж, үйл ажиллагаагаа эхлүүлээд байна. Тэрбээр, Монгол Улсын иргэншлээ сэргээж, жүдо бөхийн спортоор мэдсэн сурсан зүйлс болон арга туршлагаа монголынхоо хүүхэд залууст зааж сургах мөрөөдлөө биелүүлэхээр зорьж байгаа билээ.

        Галбадрахын Отгонцэцэг өнгөрсөн оны арваннэгдүгээр сард албан ёсоор зодог тайлсан юм. Тэрбээр 2015 онд иргэншлээ солин, дасгалжуулагч Д.Энхбаатарын хамт Казахстаныг зорин, тус улсын нэрийн өмнөөс барилдаж “Рио-2016” олимпын дэвжээнээс хүрэл медаль хүртсэн. Улмаар 2017, 2018 оны ДАШТ-ээс хүрэл медаль хүртэн, дэлхийн хошой медальтан болсон шилдэг эмэгтэй жүдоч юм.

           Мөн Ази тивийн аварга шалгаруулах тэмцээнээс 2016 онд алт, 2017 онд мөнгө, 2019 онд хүрэл, 2018 онд Азийн XVIII наадмаас хүрэл медаль хүртэж Казахстаны эмэгтэй жүдо бөхийн хөгжил, амжилтыг дараагийн шатанд гаргасан гавьяатан юм.