“UNC-2023” 15 спорт холбооны нэгдсэн УАШТ-ий сүүлийн өдөр Степпе Аренад Монголын бүжгийн спортын холбоо аваргуудаа тодруулж байна. Тэмцээн таван насны ангилалд 11 багц медалийн эздийг тодруулах бөгөөд нийт 87 хос бүжигчид өрсөлдөж байна. Тэмцээний “хүүхэд-2” ангилалд найман бүжиг, “өсвөр нас-1”, латин, “өсвөр нас-2”, залуучуудын, насанд хүрэгчид, сеньор ангилалд тус бүр стандарт, латин бүжгийн төрлүүдэд шилдгээ тодруулжээ.

        Монголын бүжгийн спортын холбоо нь анх 2001 онд байгуулагдаж, дэлхийн бүжгийн спортын холбооны гишүүн, Бүжгийн спорт Ази байгууллагын гишүүн, Монголын үндэсний олимпын хорооны гишүүн байгууллага болсон. Өнөөдрийн байдлаар бүжгийн спортын салбар холбоо нийслэлийн 9 дүүрэг, Эрдэнэт, Өвөрхангай, Төв аймаг, Өмнөговь, Дорнод, Дорноговь, Хөвсгөл, Хэнтий, Баруун 5 аймагт үйл ажиллагаагаа явуулж байна.

            Мөн Монголын бүжгийн спортын холбоо нь дээрх аймаг дүүргүүдэд анхан шатны багш дасгалжуулагч бэлтгэх лиценз олгох сургалтуудыг зохион байгуулж, жил бүр хоёр удаа гишүүн байгууллагууддаа багш дасгалжуулагчийн болон шүүгчийн конгрессыг зохион байгуулдаг болжээ.

            Тэд энэ хугацаанд Ази болон Европын “Азийн танхимын болон тулааны спортын наадам”, “Children of asia” хүүхдийн азийн спортын наадам, “Монголын бүх ард түмний спортын наадам”, “Монголын хүүхдийн спортын наадам”, “Дэлхийн аварга шалгаруулах хамтлаг бүжгийн тэмцээн”, “Азийн нэг бүжгийн аварга шалгаруулах тэмцээн”, олон улсын нээлттэй тэмцээнүүдэд амжилттай оролцжээ.