Улаанбаатар хотын аврага шалгаруулах өсвөрийн шатарчдын тэмцээнд “Гэгээ” сургуулийн бяцхан шатарчид амжилттай сайхан наадлаа. Тус сургуулиас найман насны эрэгтэй ангилалд Лхагвадэмчиг 6.5 хожил, 10 насны эмэгтэй ангилалд Тана-Эрдэнэ зургаан хожил авч улсын аварга шалгаруулах тэмцээнд оролцох эрхийг гардан авсан байна.

       Энэ тэмцээний найман насны ангилалд тус сургуулийн 1-ийн “А” ангийн сурагч Цэндээхүү, Одбаяр нар 50 хувийн амжилт үзүүлжээ. Тэд нэг ангийн найз нар бөгөөд зургаан настай атал ангилал өгсөж тоглоод ийнхүү 50 хувийн амжилт үзүүлсэн нь тун чамлахааргүй амжилт боллоо.

      “Гэгээ” сургууль нь 2022-2023 оны хичээлийн жилээс эхлэн оюуны спортын сургалтад онцгой анхаарч шатрын тусгай анги танхимыг тохижуулан туршлагатай дасгалжуулагч “ФИДЕ” мастер Ч.Мөнхбат багшийг урьж ажиллуулсан нь ийнхүү богино хугацаанд бахдам амжилт гаргахад нөлөөлснийг дурьдах нь зүйтэй юм.