Чөлөөт бөхийн Ази тивийн аварга, Ази тивийн насанд хүрэгчдийн аварга шалгаруулах тэмцээний мөнгө, хүрэл медальт, Үндэсний шигшээ баг, Налайх дүүргийн тамирчин,  ОУХМ М.Дөлгөөн энэ өдөр мэндэлжээ. Тэрбээр “Алматы-2021” чөлөөт бөхийн насанд хүрэгчдийн Ази тивийн аварга шалгаруулах тэмцээний эмэгтэйчүүдийн 55 кг-ын жинд алтан медаль хүртэж байв. М.Дөлгөөн Азийн аваргад Узбекистаны Мадина Усмонжонова, Казахстаны Айша Уалишан, БНСУ-ын Ким Хьон Жо нарыг тус бүр цэвэр ялсан ба Монгол Улсаас Ази тивийн аваргын алдрыг хүртсэн 23 дахь, эмэгтэй бөхчүүдээс ес дэх тамирчин болж байлаа.  ОУХМ М.Дөлгөөн Азийн аваргаас 2019 онд хүрэл, 2020 онд мөнгөн медаль хүртэж байсан бөгөөд ийнхүү 2021 онд алтан медаль хүртэж, Азийн аваргын иж бүрэн медальтай болсон юм.