Япон Улс, Монгол Улсын хооронд дипломат харилцаа тогтоосны 50 жилийн ойд зориулсан, Япон Улсаас Монгол Улсад суугаа Онц бөгөөд бүрэн эрхт Элчин сайдын нэрэмжит "ЖҮДО СУРАГЧ 2022" тэмцээн энэ сарын 25-наас 27-ны өдрүүдэд амжилттай зохион байгуулагдаж өндөрлөлөө. "Алдар" спорт хорооны зааланд явагдсан тус тэмцээнд нийт 60 байгууллагын 1600 гаруй өсвөрийн жүдочид ур чадвар, авхаалж самбаагаа сорин өрсөлдсөн юм.

          Монголын жүдо академийн баг тус тэмцээнд өргөн бүрэлдэхүүнтэй оролцож зургаан алт, хоёр мөнгө, зургаан хүрэл, нийт 14 медаль хүртсэн амжилт үзүүлжээ. Энэ амжилтаараа Жүдо академи охидын бага, дунд насны ангилалд багийн дүнгээр тэргүүн байр эзэлсэн бол хөвгүүдийн ахлах насанд гуравдугаар байрт шалгарсан байна.

     Ахлах насны ангилалд Г.Хангарьд алт, У.Билэгт, А.Ариунтунгалаг, О.Номинзул, Г.Ундрал нар хүрэл медаль хүртжээ. Дунд насны ангилалд Б.Батсувд, Э.Намуун-Эрдэнэ нар алт, О.Төгөлдөр мөнгө, Ц.Сод-Оргил хүрэл медаль авав. Бага насны ангилалд Б.Мөнгөндөл, Э.Аялгуун, Э.Цэлмүүн нар алт, Х.Золжаргал мөнгө, Ц.Гэгээн хүрэл медаль хүртжээ.