Тулгар төрийн 2231, Их Монгол Улс байгуулсны 816 жил, эзэн богд Чингис хаан мэндэлсний 860 жилийн ой, Монгол бахархлын өдрийг тохиолдуулан Монгол Улсын Ерөнхийлөгчийн 2022 оны арваннэгдүгээр сарын 22-ний өдрийн 212 зарлигаар Биеийн тамир, спортын салбарт үр бүтээлтэй ажиллаж, үнэтэй хувь нэмэр оруулан эх орныхоо нэрийг олимп, тив, дэлхийн тавцанд дурсгасан тамирчин, дасгалжуулагч, спортын зүтгэлтнүүдэд төрийн дээд цол, одон медаль гардуулах ёслол өчигдөр Спортын төв ордны “А “зааланд болов.

    Ёслолд Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ, Монгол Улсын Ерөнхийлөгчийн Эрүүл мэнд, спорт, нийгмийн бодлогын зөвлөх Т.Мөнхсайхан, Биеийн тамир, спортын улсын хорооны дарга Д.Жаргалсайхан, МҮОХ-ны тэргүүн дэд ерөнхийлөгч Ч.Наранбаатар нарын хүндтэй эрхмүүд оролцов.

     Хүндийн өргөлтийн дасгалжуулагч Сунравын Хөхөө, цанын Гэндгээгийн Батмөнх, улсын заан Дасрангийн Мягмар нар Монгол Улсын гавьяат дасгалжуулагч цол тэмдгээр шагнуулав. Гимнастикийн багш, дасгалжуулагч Доржийн Норолхоо Монгол Улсын гавьяат багш боллоо. Харин хөнгөн атлетикийн ахмад тамирчин Рамзаны Алданыш, дугуйн Доржпаламын Цолмон, хүчний гурван төрөлтийн Батаагийн Чимэдцэрэн нар Монгол Улсын гавьяат тамирчин цол тэмдэг хүртлээ.