Нийслэлийн Засаг даргын ивээл дор зохиогдож буй "Алхацгаая, Гүйцгээе" аян, Хан-Уул дүүргийн засаг даргын 2021-2024 онд хэрэгжүүлэх “Эко-Эрүүл дүүрэг” үйл ажиллагааны мөрийн хөтөлбөрийн хүрээнд "Хамтдаа алхаад эрүүлжье" уриатайгаар явган алхалтын арга хэмжээг өнөөдөр буюу 12-ны өдөр боллоо.

     Наймдугаар хорооны нутаг, дэвсгэр “Чингисийн хүрээ” жуулчны бааз Жаргалантын ам чиглэлд эрүүл агаарт алхаж, хөгжөөнт буухиа тэмцээнд авхаалж самбаагаа сорин уралдаж амралтын өдрөө эрүүл, эко аргаар биеийн дархлаагаа дэмжиж өнгөрүүллээ.

    Энэ удаагийн ээлжилт явган алхалтад хуваарийн дагуу Хан-Уул дүүргийн ерөнхий боловсролын зургаан сургуулийн 80 гаруй багш, сурагчид хамрагдлаа. Багийн нэгдсэн дүнгээр нэгдүгээр байрт Хан-Уул дүүргийн 118 дугаар сургууль, хоёрдугаар байрт Хан-Уул дүүргийн 34 дүгээр сургууль, гуравдугаар байрт Хан-Уул дүүргийн VII сургуулийн баг тус тус шалгарлаа.