Сонгинохайрхан дүүргийн 30 жил, “Макс” группын 30 жил, “MJ” нийгэмлэгийн 20 жилийн ойн нэрэмжит "MJ CUP 2022" жүдо бөхийн өсвөр үеийн тэмцээн энэ сарын 18-19-ний өдрүүдэд зохион байгуулагдлаа. Монголын жүдо академийн баг энэ тэмцээнд оролцож гурван алт, нэг мөнгө, долоон хүрэл нийт 11 медаль хүртсэн амжилт үзүүлэн, охидын багийн дүнгээр хоёрдугаар байрт шалгарлаа.

    Энэ удаагийн тэмцээн Сонгинохайрхан дүүргийн “Спорт цогцолбор"-т дунд, ахлах насны ангиллаар явагдсан. Тус тэмцээнд 50 байгууллагын нийт 1000 гаруй өсвөрийн тамирчид хүч чадал, ур чадвараа сорин өрсөлдсөн юм. Тэмцээний дунд насны хөвгүүдийн 34 кг-ын жинд  Ц.Сод-Оргил, 55 кг-д У.Энх-Учрал хүрэл медаль, 66 кг-ын жинд  У.Мөнх-Учрал алтан медаль хүртсэн.

      Дунд насны охидын 40 кг-д Э.Цэлмүүн хүрэл, 48 кг-д Б.Батсувд  алт, 57 кг-д Э.Аялгуун алтан медаль авсан. Ахлах насны хөвгүүдийн  73 кг-ын  У.Билэгт, М.Түвшинбаяр, 90 кг-д У.Уртнасан хүрэл медаль хүртсэн юм. Ахлах насны охидын 57 кг-ын жинд  Х.Ариунтунгалаг мөнгө медаль, 63 кг-д  Г.Ундрал хүрэл медаль хүртсэн амжилт үзүүллээ.