ОУОХ-ны дэд ерөнхийлөгч Хуан Антонио Самаранч энэ өдрүүдэд манай оронд ажлын айлчлал хийлээ. Айлчлалын үеэр түүнийг төр засгийн удирдлагуудын түвшинд хүлээн авч уулзан спорт, олимпизмыг хөгжүүлэх талаар ажил хэргийн яриа өрнүүлсэн. Нийслэлийн Засаг дарга, “Парис-2024” олимпын Монголын багийн ахлагч, “Улаанбаатар-2023” Зүүн Азийн залуучуудын наадмын Зохион байгуулах хорооны дарга Д.Сумъяабазар ноён Самаранчийг албан өрөөндөө хүлээн авч уулзсан юм. Уулзалтын үеэр Засаг дарга Д.Сумъяабазар ирэх онд Улаанбаатар хотноо зохиогдох Зүүн Азийн залуучуудын наадмын бэлтгэл ажлын талаар мэдээлэл өгөв.

      Наадмын зохион байгуулах хороог чадварлаг баг удирдаж байгааг харсан тул манай улс тус наадмыг өндөр түвшинд зохион байгуулна гэдэгт эргэлзэхгүй байгаагаа ноён Самаранч илэрхийлсэн юм. Түүнчлэн ноён Самаранч олимпын наадамд оролцож байсан тамирчин хүнтэй уулзахад үргэлж таатай байдгийг хэлж, тамирчны дараах карьерийн шилжилтээ амжилттай хийсэнд талархаж байгаагаа илэрхийлэв. Засаг дарга Д.Сумъяабазар “Парис-2024” олимпын Монголын багийн ахлагчийн хувиар наадмын бэлтгэл ажлын явцаас танилцуулж, айсуй олимпод өндөр амжилт гаргахын тулд төрийн зүгээс бүхий л талаар дэмжин тусалж буйг уламжлав.

       ОУОХ-ны дэд ерөнхийлөгч Самаранч Парисын олимпын зохион байгуулалтын талаар мэдээлэл өгч, манай тамирчдыг тус олимпод амжилттай оролцоно гэдэгт итгэлтэй байгаагаа илэрхийлэв. “Парис-2024” олимпын зохион байгуулагчид нээлтийн ёслолыг Сена мөрний эрэг дээр өвөрмөц байдлаар зохион байгуулахаар төлөвлөж буйг ноён Самаранч танилцуулсан. Тухайлбал, баг тамирчид нээлтийн ёслолд завин дээр суун Сена мөрний уснаа хөвсөөр орж ирэх өвөрмөц шийдлийг зохион байгуулагчид санал болгож байгаа билээ.