Армен Улсын нийслэл Ереван хотод  энэ сарын 13-16-ны өдрүүдэд явагдаж буй самбо бөхийн өсвөр үе, залуучуудын ДАШТ-ий өсвөр насны ангилалд манай охид хөвгүүд нэг алт, дөрвөн мөнгө, нэг хүрэл медаль хүртлээ. Хөвгүүдийн 64 кг-ын жинд барилдсан “Чандмань Оргил” дэвжээний Б.Батдаваа алтан медаль хүртэж, өсвөрийн дэлхийн аварга боллоо.

Энэ удаагийн самбо бөхий дэлхийн аварга шалгаруулах тэмцээнд 25 орны 1000 гаруй өсвөрийн тамирчид өрсөлдөж байна. Манай улсын багийг Монгол Улсын гавьяат дасгалжуулагч Ж.Баярсайхан, Хаштогтох, Энхбаяр нар дасгалжуулж байна. Самбо бөхийн өсвөр, залуучуудын дэлхийн аварга шалгаруулах тэмцээний хоёр дахь өдөр өсвөрийн охидын 47 кг-д Н.Ундрахбаяр “Спорт сургууль”, 54 кг-д О.Оюунчимэг Сонгино хайрхан дүүргийн Спорт хороо, “Хаан Хүнс импкес”, 72 кг-д У.Анужин Хан-Уул дүүрэг “ Женко” клуб, +80 кг-д Ц.Санжидмаа “Женко” клубийн тамирчин мөнгөн медаль, 65 кг-д “Хүч” спорт хорооны Д.Есүй хүрэл медаль хүртсэн амжилт үзүүлээд байна.